Auguri : un’ospitale novu per Bastia

U mese di ghjennaghju ghje mese d’auguri. Non solu quelli sparti trà noi, famiglia, parenti, amici, culleghi di travagliu, o cunniscenze, ma ci sò dinò l’auguri, chjamemu li ufficiali. Quelli di i merri, di i presidenti di culletività publiche è più insù quelli di u presidente di a republica, di u guvernu è u corpu diplumaticu à u stessu presidente,  quelli dunque di i detti corpi custituiti. In regula generale ste ceremonie obedicenu à una liturgia tradiziunale,  furmale. In quant’à e strutture pulitiche ghje l’occasione di fà un bilanciù di l’annata scorsa, in generale presentata cume pusitiva, è di annunzià i prugetti per l’annu novu. Tuttu què sottu à l’aplausi di i participenti perche in sti mumenti ùn si face sente uppusizione.

Dunque in stu gennaghju sta settimana, s’he fatta a rientrata sulenne di i tribunali è di a Corte d’Appellu. Ceremonie culurite da e robe negre è mantelette d’ermellina bianca è rossa di i magistratti. U pudere ghjudizariu mostra cusi à so pudenza è a so singularità d’indipendenza, di fronte à u pudere puliticu. Soli à ùn’avè robe o mantelette so i magistratti eletti di i cunsigli prudumali, decurati unicamente di una culana. E tutta sta ghjente ci struisce di i fatti ghjudiziarii è di a bona tenuta di a ghjustizia in corsica, in fine sè no i sentimu. A realità ghje spessu altra.

A ceremonia à a quale aghju assistitu ghje quella di l’auguri à l’ospitale di Bastia. U stabilimentu, dopu a merria podasse,   chi impiega u più ghjente. Simu vicini o si spassa i 1500. L’ospitale di Bastia chi ghjoca ùn rolu primurdiale per à salute in corsica, ma secondu  parechji spezialisti o eletti, chi ùn riceve micca abbastanza aiuti publichi da rapportu à  so impurtenza, à u cuntrariu di l’ospitale d’Aiacciu. Si sà  è pulitiche frencese nanta qualùnque capitulu so centralizate, è e capitale naziunale o regiunale, ricevenu in generale più che l’altre cità. Hè cusi. E allora che Aiacciu in stu principiu d’annu si stalla indè un’opistale novu e mudernu, Bastia aspetta sempre u soiu allora che u bisognu ghje in casa, l’attuale ùn ghje più adattu . Qualè sarà dunque a rispota di u guvernu di fronte à e dumande di i prufeziunali di a salute di Bastia, di l’eletti , è di u cunsigliu d’aministrazione ? Risposta , si spera, à marzu. Ma nùnda ùn ghje sicuru, malgratu l’auguriu di tutti prununziatu à a ceremonia di bon’annu .

Petru Luigi Alessandri