Cume di solitu ogn’annu à settembre u sport piglia postu Piazza Santu Niculà in Bastia. E st’annu c’era ancu una stesa longa u mare, nant’u a spassighjata chi và versu u portu vecchju, pruvendu cusi u successu di sta manifestazione urganizata dà a Cummunità di Cummune di u circondu bastiacciu. Tutt’è spezialità spurtive di l’isula avianu una bancarella induvè si presentava l’ attività. Ballò bella sicura, tennis,handball, basket ball , atlétismu, judo, karatè per i classichi. Ma dinò, bocce, ping- pong, taekwondo ecc…Dui ghjorni di festa, di prove, di pratica, è di scrizzione per un publicu assai numerosu. I club anu urganizatu une poche di dimustrazione spurtive chi anu custituitu un spettaculu permanente. In sta rientrata, a maiò parte di i visitatori, ghjera giovana, anzi ghjuvanissima.
A Corsica spessu s’hè alzata à i livelli naziunali è internaziunali in sport. Omu un si scorda i a squadrà di ballò di bastia, u sporting, chi hà guadantu a cupa di Francia in 1981 è chi ghje ghjunta in finale di a cupa d’Auropa in 1978. Più vicinu u percorsu sensaziunale di Morhad Andoumi di u club di Bastia AJB chi hà vintu parechji campiunati naziunali è internaziunali, in atletismu (corsa).2 007 ghje campione d’Auropa junior, in 2009 ghje seleziunatu per i campiunati di u mondu à Berlin, in 2016 ghje campione di Francia di u 5000 metri , è in agostu scorsu ghje medaglia d’oru di u 10.000 metri à i campiunati di Berlinu . E federazione corse so ricche di centinaie di membri . A più impurtente ghje quella di ballò. Ma in seconda pusizione c’hè u tennis chi conta 3800 licenziati in Corsica. Ghje a prima pratica spurtiva per l’attività individuale.
Una festa di u sport urganizata innu tempu tantu favurevule dopu à l’annunziu da u Guvernu di tagli maiò indè u bugettu naziunale di u ministeru di i sport. Un bugettu chi prevedde a suppressione di 1600 posti , in particulare quelli di i direttori tecnichi di e sfarente federazione, chi so pagati da u Statu. Ancu a nova ministra di i sport Roxana Maracineanu l’ hà qualificati « d’annunzii tropu brutali ». A Francia po esse campiona di u mondu di football ,un scambia nùnda per u Guvernu.
In ogni modu a festa di u sport di Bastia averà accoltu durente dui ghjorni una media di 17000 visitatori.
—
Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.