Valls : Una visita per nunda ?

A visita di u Primu Ministru Manuel Valls in Corsica lascia sintimi diversi. I naziunalisti so delusi, a dritta ùn vole culletività unica cume prevista, i cummunisti ùn ne volenu micca d’u tuttu, a manca ghje cusì cusì. Ma u discorsu di fermezza nant’à u ricusu di l’amnistìa per i crimi di sangue (dunque per l’assassini di u Prefettu Erignac innu 1998), per a cuufficialità di a lingua corsa incù u francese, di u statutu di residente, o di quellu fiscale specificu , po sudisfà ne parechji a dritta é a manca.

Per riasume u discorsu di Manuel Valls u tema centrale serebbe : A Corsica ghje Francese è sottumessa à listesse legge che dapertuttu in Francia. A custituzione ùn favurisce sviamenti. Solu si pò mudificà à a periferìa è quandu a custituzione à permette. I naziunalisti una volta di più so avertiti, è averannu motu à zumpà ùn scambiera nunda. In tutti casi fina che stu guvernu sera à u putere. E si pò pensà che s’ellu scambia girendu à dritta à maghju 2017, e cose ùn scambieranu nanta i punti principali.

In quant’à i sindicalisti di a CGT, di FO, di Solidaires, di a FSU (educazione naziunale) chi hanu accoltu u Primu Ministru in mughjendu “demissione”, in particulare in Bastia, ùn’hanu avutu suddisfazione nantu a legge travagliu è u so votu allarga un pò più u fossu tra u guvernu è a maggiurità di i sindicati. Quì dinò Valls ùn’hà cedutu. Puterebbe pagalla à a rientrata di settembre chi s’annunzia agitata à u livellu suciale, o ancu di più à l’elezzione presidenziale di l’annu prossimu.
Finalmente, omu si pone a questione di sapè cosa hè venutu à fà Valls in Corsica ?

—-
Articulu di: Petru Luigi Alessandri