L’ospitale di Bastia hà oramai una struttura di prima impurtenza per curà u cancaru di u senu : L’Istitutu di U Senu. Cumpostu da medichi, Infirmieri cuudinatori è una radiulogìa muderna. L’istitutu vole esse una rete di cullaburazione tra a cità è l’ospitale unicamente centratu nant’à patulugìa senologica.
L’ospitale di Bastìa ghjè u solu in Corsica Suprana autorizatu à praticà a chirurgìa di u cancaru di u senu perchè risponde à e regule definite da l’Istitutu naziunale di u Cancaru, ma travaglia in cullaburazione incù l’altri stabilimenti privati cittatini.
I rispunsevuli di l’istitutu bastiacciu, i duttori Orabona radiologicu, Alfonsi chirurgu e u direttore di l’ospitale Pasquale Forcioli, anu fattu un primu bilanciu sei mesi dopu a messa in opera di a struttura, e dinò à l’occasione di l’operazione naziunale “Ottobre rusulinu” urganizata in Francia per luttà contra u cancaru di u senu.
Dipoi aprile 2016, 600 mammugrafìe sò state praticate è dipoi u principiu di l’annu 145 operazione sò state realizate, incù 130 cancari. In 2015 ci n’hè statu 196 è in 2014, 208. 33 % di l’operazione sò fatte in modu ambulatoriu, vale à dì chì u paziente stà pocu tempu à l’ospitale. I rispunsevuli medicali anu specificatu chì oramai l’ospitale di Bastia ghjè ricunnisciutu cum’è un centru d’investigazione in ricerca clinica per u cancaru di u senu. Incù l’ospitali universitari naziunali s’iscrive ind’è un’andatura d’ameliurazione di e pratiche, per fà participà i malati à prove cliniche, è falli dinò benefizià di i prugressi per e cure di i cancari. Unu di i vantaghji di l’istitutu di u senu di Bastìa ghjè a presa in carga rapida di u malatu in 3 ghjorni.
—-
Articulu di Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione 
Guillaume Bereni