Vi ne vurria parlà: Ghjenuva, superba è ancu di più

Omu sà chì u raportu di noi corsi cù l’Italia hè cumplessu. Stirizzatu da e diverse strate, ognitantu felice è spessu cumplicate, di sta longa storia cumuna. Sintimi diversi s’imbuleghjanu quandu da a Corsica si guarda versu a penisula. Ma sò pochi quelli cù qualli aghju parlatu di u so viaghju in Italia è chì ùn mi anu dettu, cù quell’ochji testimoni di una vera felicità, chì in quellu paese c’era qualcosa di speciale per noi corsi. Un sintimu di benestà si accende, sopratuttu quandu ci n’andemu culà pè a prima volta. Truvemu una parte di noi stessi. Forse micca persa, ma simpliciamente ignota fin’ora.

Quande no’ discutemu di viaghji in Italia cù l’amichi, cù a famiglia, dicu sempre chì forse a più bella cità d’Italia (à lu mio mudestu parè!) ghjè Firenze. Avete raggiò, ùn corru tanti rischi cù quella scelta. Ma aghjunghju subitu chì a mo preferita, quella chì mi hà daveru culpitu l’anima quandu l’aghju scuperta (soltantu qualchi anni fa); quella induve mi piacerebbe campà sè duvia andamine da a Corsica, ghjè Ghjenuva. Scrivendu ste qualchi parole mi rivene in mente quell’ochji immensi di quelli chì ùn mi vuglianu crede, ma chì cuncedianu subitu (pè a maiò parte) d’ùn avè mai veramente visitatu Ghjenuva.

Tandu mi trovu obligatu d’inghjunghjerli à scopre veramente a “Superba”. A piglià un battellu chì và da Bastia direttamente à Ghjenuva pè apprufità, ind’è l’ultima ora di navigazione, di a vista nant’à quella vechja cità. Una cità verticale, aperta nant’à u mare è attempu affiancata à i monti. Un rigalu pè a pioggia chì hè certamente simbolu di a cità, quantu l’hè a magnifica “Lanterna”. Da u battellu digià, fighjendu u Portu Anticu si risente a putenza di una cità chì hà scrittu a so storia nant’à u mare, da u Mediterraniu à u Mare Neru. C’è d’altronde un museu dedicatu à a storia navale in Ghjenuva, accantu à unu di i più grandi acquari in tutta l’Europa. Qualessa sia a vostra passione legata à u mare, c’è certamente in Ghjenuva a scuperta chì vì cunvene.

A quelli amichi, a quella famiglia, dicu sempre di piglià qualchi ore pè spassighjà ind’è i carrughji stretti di a vechja cità. A Maddalena, San Vincenzo, Pré, e tutti quelli lochi cumposti di strette à l’infinitu, di piccule butteghe, di profumi mischjati, simpliciamente di vita. Una vita chì diventa più bella cù una bella manghjata di focaccia, quella Ghjenuvese essendu una vera opera d’arte in qualchi lochi. E pò ci sò tant’altre specialità bonissime in quella cità, è più largamente in Liguria.

Spassighjà attraversu sta cità ci rigala sempre belle scuperte, da quelli carrughji famosi à e piazzette nascose. Da una chjesa maestosa à l’altra (mi hè piaciuta in particulare quella di a Santissima Annunziata del Vastato), da i sapori di u Mercato Orientale à i profumi prufondi di u portu. Quandu mi trovu in Ghjenuva mi vene in mente Bastia. Micca solu attraversu una certa sumiglianza quandu si guarda l’antiche parte di ogni cità. Ma c’è dinù un’ambiante, l’idea di una cità vera, cù i cuntorni surzi ma l’anima pura.

Sò andatu parechje volte a Ghjenuva e mi sò sempre trovu bè. Simpliciamente bè. Ricordu in particulare a cullata in funiculare nant’à a linea “Zecca-Righi”. Un mumentu piacevule, tranquillu, chì ramenta quant’hè verticale questa cità! Ghjuntu nant’à l’altezze di Ghjenuva, mi ne sò andatu pè isse muntagne vicine. Una spassighjta calma, chì mi hà rigalatu una bella vista nant’à tuttu u rughjone, attempu à a scuperta di l’antichi forti chì tandu pruteghjianu a cità.

Da quassù, fighjendu a parte sud di Ghjenuva, si vidia u quartiere di Marassi è u so stadiu Luigi Ferraris. U postu di una passione feroce pè a propria identità ghjenuvese, trà quelli chì sustenenu l’anticu Genoa, primu vincitore di u “Scudetto”. E l’altri di a Sampdoria, chì à l’iniziu di l’anni noventa avianu purtatu u nome di Ghjenuva à un passu di a storia in Europa. Iè, avemu ancu qualchi sognu spurtivu in cumunu.

Si puderebbe (ci volerebbe!) dedicà à Ghjenuva tantissime altre righe. Ma finisceraghju cù una parola nant’à una piccula spassighjata, vissuta un dopumeziornu d’aprile cù a mo moglia. Avemu pigliatu u trenu fin’à u quartiere di Nervi. E po’, dopu qualchi passu, avemu raghjuntu u caminu chjamatu “Passeggiata Anita Garibaldi”. U percorsu, affiancatu à u mare, hè meravigliosu. A vista, l’aria marina, i giardini, i borghi… Ci torneremu è so sicuru chì u piacè di a scuperta sarà lu stessu.

Qualchi tempu fa, era in vittura nant’à e strade di a mia Alisgiani. Ognitantu accendu a radio è in quellu ghjornu (cume tutti l’altri in Alisgiani pè dilla franca) l’unica radio chì funzionava ghjera Radio 1. Aghju scupertu tandu a canzona chjamata “Genova per noi” è avà chì ci pensu, forse aghju avutu anch’eiu “quella faccia un po’ così, quell’espressione un po’ così, che abbiamo noi mentre guardiamo Genova”. E mi ne pentu vulenteri.

Guillaume Bereni