Settimana Santa in Corsica: U dulurisimu di a Passione di Cristu

Incù a dumenica di e Palme presidata in San Ghjuvà in Bastia da u cardinale Bustillo, simu entrati in Settimana Santa. S’apre cusì, in Corsica in particulare, un periodu di prufonda tradizione religiosa. Tradizione chi cunnusceranu un pichju i ghjovi e venneri santu è, bella sicura, à Pasqua. Ma ghjè indè u dulurismu di a passione di Gesù che i corsi si ricunnoscenu.

U caratteru dramaticu di ste cummemurazione fanu simbiosi incù u sintimu, a storia, a cultura di a Corsica, più che indè a gioia di u Cristu risortu à Pasqua. Dipoi a riforma liturgica di vaticanu dui ùn c’hè più l’uffiziu di e tenebre, i tarnimuri, di i luni marti è mercuri santu, chì ghjera cunclusu da i rumori di e ragane  di e chjoche, di i pichji di i banchi in chjesa. Fracassu in pienu bughju chi simbulizava u strapassu, u sussuru pruvucatu indè l’ambiente à a morte di u Signore.

Granitule, Catenacci è Via Cruci

A e palme, crucette, alivu, pullezulle seguiteranu, cerche in Pieve di Lota, Catenacciu in Sartè, Incatinatu in Bisinchi, Granitule in corti e in d’altre pieve, prucessiò di u Cristu Negru, e sepolcri in Bastia. Un custume specificu à Bastia. U ghjovi Santu i bastiacci sortenu di notte per visità i sepolcri. Ci tocc’à visitane un numeru sparu . Si visita in primu l’altare (micca principale), induvè l’hè postu u santissimu, un obligu di a liturgìa di stu ghjornu, induvè lu si caccia l’ostia di u tabernaculu maggiore per sponela in’unaltare secondariu di a chjesa. Cumencia cusì u spogliu di a chjesa chi si viota di i so ornamenti, in segnu di dolu è d’attesa di a notte pasquale. Poi si và indè capelle à visità i sepolcri chi ripresentanu una pagina di a passione di Gesù. Cume quelli di San Roccu è di a Cuncessiò in via Napuleò chi sò stati dipinti più di 60 anni fà per u premiu di Roma, Ettore Filippi.

Settimana Santa e Venneri Santu chì straccina nu via cruci in ogni loghi. Cristi morti e Madone adulurate cume in Corti o in Balagna. Curtei preceduti di cunfratelli incamisgiati e incapucciati purtendu spessu cunfaloni. In Settimana Santa i 3000 cunfratelli aduniti in cunfraternite spaperse in parrochje, chjese paesane o capelle, anu da và. Sò elle chi sò i principali custodi di ste tradizione, è dipoi parechj’anni anu rifiuritu. Un bisognu di ritruvà u nucleu, a radica di un’espressione, una manera, qualchi volta teatrale, di traduce à so fede (per a maiò parte) o u so legame strettu incù u so paese, à so cità, à so pieve.

Sta multitudine di cunfraternite puterebbe esse un segnu di un rinovu religiosu? A realità ghjè più cumplessa. Ste cunfraternite so qualchi volta un logu di ritrovu, ma dinò di spartera pulitica più che religiosa, o incù a religione cume scusa. O! Un ghjè micca un fenomenu novu, tempi fà c’eranu cunfraternite più à dritta o più à manca, oghje so piutostu naziunaliste, ma non tutte.

I corsi si aduniscenu in massa per ritrovi religiosi annuali. A Madunuccia in Aiacciu, San Ghjisè e San’Untò in Bastia, A Madona di Lavasina, à Santa in Niolu. Ma a frequentazione di e messe duminicale ghjè poca, a pratica di i santi sacramenti ghjè in calata cume a pratica religiosa in generale. I preti sò pochi è vechji in maiò parte. Cunsequenza, anu in carica parechje parochje e micca solu indè u rurale. In Bastia San Ghjuvà è Santa Maria anu un stessu curatu. Sta puvertà spirituale va à paru incu a puvertà materiale. A chjesa di Corsica ghjè povera è hà bisognu di solli. Eccu u custatu. Ma ferma a sperenza di a fede, chì cume dice a parolla evangelica “pesa e muntagne.”

Petru luigi Alessandri