A Ministra di l’ambiente di l’energia é di u mare in Corsica: So ghjunta per aiutavvi

Per tre ghjorni Ségolène Royal Ministra di l’ambiente, di l’energìa, é di u mare era in visita in Corsica é sopra tuttu in Corsica suprana per prima ufficializà u parcu marinu di u capi corsu natu st’estate. E cusi chellu hè statu elettu presidente di stu parcu, Gigliu Simeoni. Una presidenza di più per u padrone di a giunta regiunale. Ma a Ministra hà vulsutu purtà u sustegnu di u guvernu à i vignaghjoli di Patrimoniu dannighjati da a temperà di settimane fà. Ghje andata soprà logu é hà dettu à i culpiti ch’ella ferà tuttu chì ci vole per accelerà l’indennisazione. Dopu e vigne, e scole. In qualità di Ministrà di u mare hà visitatu a scola di marina è di a pesca di Bastia custruita 50 anni fà in citadella di Bastia. Una custruzzione chi rompe l’armunìa architetturale di stu logu storicu di a cità. 200 studienti, zitelli è zitelle, à livelli é diplomi sfarenti amparanu u mistieru di marinare o di piscatore, ma dino so iniziati à quellu di pumpieru marittimu. Ségolène Royal hà scontru i sculari, interessata da i so studii é e sò attività, ma hà custatatu che u stabilimentu ghjera in cattivu statu. E perciò che una prucedura di restauru ghje stata decisa da a merrìa di Bastia é a Regione. Si riferà l’internatu in modu d’energìa durabile ma sopra tuttu u palazzu serà rialzatu, è què ùn piace à l’abitenti di a citadella chi si so aduniti in associu di difesa.” U rialzamentu serebbe un’altra operazione di rompitura architetturale di l’inseme di u patrimoniu di stu logu induve ghje nata Bastìa è induve c’hè palazzi storichi cume quellu di i Guvernatori o a cattedrale” dice l’associu. A sola suluzione ghje di ricustruì a scola in’altrò è di fà di stu logu chi dumineghja u mare, un bellu giardinu” prupone l’associu. Ma a municipalità di Bastia é a Regione ùn l’intendenu cusì. Segolene Royal hà dettu, ella, ch’ella darà soldi per u restauru. “U statu v’aiuterà” hà lanciatu à Gigliu Simeoni. A Ministra d’altronde s’hè fermata à dorme inde un albergu di a citadella vicinu à a scola di marina è custruitu pocu fà indè u stile di l’epuca quattrucentesca.

In fine a visità di a Ministra s’hè compia per un’appuntamentu nant’à u portu di Bastia per parlà, si capisce, di trasporti marittimi.

Petru Luigi Alessandri