Alessandra Todde sarà a prima donna à direge a Sardegna. Dumenica scorsa ha vintu l’elezzione territuriale incù una lista d’unione di manca. Una vittoria nant’à u filu incù solu più di 2600 voti in più nant’à u so cuncurrente Paolo Truzzu, merre di Cagliari. So e cità maiò chì anu fattu a differenza, in particulare Sassari, Nuoro è a Capitale induve u merre ghjè statu scunfittu incù un ritardu di 18000 voce nanta Todde. Ghjè un schiaffu per u leader di Fratelli d’Italia in Sardegna. Ben che ùn sia stata aspettata da i sundaggi, a vittoria di Alessandra Todde un’ha micca surpresu. A vittoria di a manca sparte di novu e carte pulitiche di l’isula. U PD diventa cusì u primu partitu spassendu di pocu incù 13.9% u partitu di strema dritta Fratelli d’Italia, chi ghjera creditatu di un 20% è chi si hè fermatu à un pò più di 13%. U partitu di a nova presidente u Muvimentu 5 Stelle face un tutale di 7,7%.
Sardisti è independentisti à paghjolu
Renato Soru chì ghjera digià statu presidente di a giunta sarda da 2004 à 2009, è chi riccuglìa i partiti sardisti, face 8,6%. In quant’à i partiti independentisti ùn spassanu l’1%. A vittoria di a manca un ghjè stata pussibile che incù una strategìa d’unione. E cusì che li si sò aduniti u PD, u M5s, i Verdi, i prugressisti, sinistra futura, sucialisti, orizzonte è uniti per Todde. Sta vittoria hè un signale negativu per u Guvernu di strema dritta di Giorgia Meloni chì cunnosce cusì indè un territoriu naziunale una prima scunfitta dipoi à so custituzione in 2022. Hè a prova che sé e forze di manca s’aduniscenu ponu guadagnà. Un messagiu mandatu à l’altri partiti in regione cume l’Abruzzo, a Basilicata o u Piemonte chì vuteranu trà qualche settimana.
A Vittoria di a manca in Sardegna puderebbe dunque esse un modellu, è cume à ricurdava l’ex-Presidente Prodi “più si hè uniti, più si vince”. Incù 45,4% di i voti a manca averà 36 cunsigliere nanta 60, 24 per l’uppusizione. U gruppu u più impurtente di a maggiurità sarà u PD incù 11 cunsigleri, chi assumerà a Vice-Presidenza. Ma a prima reunione di u cunsigliu regiunale un ghjè prevista che per aprile, in stu frà tempu Alessandra Todde custituisce à so giunta è mette in opera e prime forme di à so pulitica.
L’analisi di Vito Biolchini
Vito Biolchini, giurnalistu di a RAI Sardegna è animatore di a trasmissione Mediterradio nanta RCFM, ha datu à P.L. Alessandri un cummentu di st’elezzione.
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione 
Guillaume Bereni