Vi ne vurria parlà: ricordi di ste ghjurnate beate in Elba

Circhendu ind’è u m’ordinadore qualche foto di girandulate pè spartele nant’à e rette suciali di Corsica Oggi, sò cascatu nant’à vechji ritratti d’Elba. A dila franca, ùn so micca cusì “vechji”: sò andatu in Elba quattru volte trà u 2008 è u 2012. Ma forse i tempi anu cambiatu. Tandu ùn esistia micca Corsica Oggi, e squadre taliane di pallò facianu sempre tremà l’Europa, per andà nant’à l’isula d’Elba si aspettava Pasqua o Penticosta e sta ghjurnata cusì speciala urganizzata da a SNCM.

Se pudemu dì senza dubbi chì i corsi ùn cunnoscenu cusì bè l’Italia cuntinentale (è vice versa), Elba ancu menu. Cusì vicina, cusì luntana! Eppuru noi corsi di a faccia orientale a vidimu tutti i ghjorni esce sopre à u mare, accantu à l’isula di Montecristo, ind’un spettaculu chì mai ci stancherà. Allora tandu, prima chì a Corsica Ferries ha cuminciatu à prupone cullegamenti regolari durante a staghjone, parechji corsi aspettavanu a dumenica di Pasqua o Penticosta (dipendia, era unu o l’altru se ricordu bè) pè scopre e bellezze di l’isula d’Elba.

M’aricordu di un battellu sempre pienu a buzeffu, cù ghjente di tutta a Corsica. Si partia à ott’ore di Bastia, pè ghjunghje in Portoferraio versu 10 ore è mezu. Ci sembrava infiniscevule. E attempu piacevule, perchè s’incontrava sempre à qualchisia che no cunusciamu, l’ambianza nant’à u battellu era sempre amichevule. Poi, ghjunti in Portoferraio, era tempu di garbassi ciò per quale eravamu venuti: a bellezza di i loghi, a dulcezza di u cibbu, a musica di a lingua, simpliciamente un soffiu d’Italia per un ghjornu.

In un postu cusì cuncentratu, una surpresa vene dopu à l’altra in poche ore. Ricordu u bellissimu paese di Marciana, cusì fiuritu è pulitu, è quella vista nant’à u mare. Ricordu ancu cù una certa nostalgia un pezzettu di pizza meravigliosu, cumpratu in un picculu postu in Capoliveri. Ancu a scuperta di Rio nell’Elba sottu a pioggia in lu 2009 è statu un mumentu indimentichevule. E avà chì ci pensu, mi dumandu se esiste sempre stu caffè di Porto Azzuro, induve u patrone era appassiunatu di ranochje? C’eranu ogetti in forma di ranochja dapertuttu.

Poi una volta ci simu andatu senza vittura e simu rimasti a Portoferraio, perchè quell’annu a ghjurnata Bastia-Elba cascava quandu era urganizzatu un grande mercatu, cù mercanti venuti di tutta l’Europa. Era un mercatu daveru incredibile, in quella città cusì bella. L’isula d’Elba hè simpliciamente un cuncentratu di e bellezze di u nostru Mediterraniu. Una piccula Corsica… O forse a Corsica hè una grande Elba?

Quandu ghjunghjia l’ora di torna nant’à u battellu, era sempre cù u core strettu ma cù l’anima legera. Un ci vulia scurdà di fassi qualche spese prima di tornà in Corsica! Qualcosa da manghjà è, bella sicuru, una “maglia tarocca” di qualche squadra di calcio (quantu soldu aghju buttatu cù quelle maglie brutte!). L’ultima volta ch’aghju parlatu cù una persona nant’à a terra d’Elba, era un signore chì gestia una piccula buttega in Portoferraio.

Vulia cumprà una tazza cù un stemma di una squadra di pallò è, tantu pè cambià di a solita Fiorentina, aghju dumandatu quella di a Lazio Roma. U signore mi ha fighjatu è mi hà dettu, cù a sigaretta bè appicciata in bocca, “bah, la Lazio! La Lazio non vale un ca**o! Lei dovrebbe tifare Fiorentina”. Aghju quantunque pigliatu a mo tazza. Oghje mi ricorda sempre quelli mumenti simplici è beati in Elba (è di cuntinuà di sustene a Fiorentina).

Un ghjornu, ci torneremu.

Guillaume Bereni