Si parla zeneise à Bastia stu venneri, cù Michele Ferroni

Da u 16 à u 21 di ferraghju, Bastia festeghja a lingua materna. Parechji scontri culturali saranu pruposti, pè i chjuchi cume pè i maiò, intorn’à a richezza di a lingua, u so postu ind’un mondu sempre più glubalizatu. Un si ripete mai assai quantu a nostra lingua hè invariabilmente legata à u nostru patrimoniu, à a nostra cultura è ancu se ne scurdemu da tandu in tandu, a lingua hè parte di u nostru futuru.

A Festa di a Lingua Materna di Bastia ci prupone per esempiu una cunferenza chjamata «U giru di u mondu in 90 minuti : E lingue inde u pallò», cundutta da Didier Rey, dottore in Storia è Maestru di Cunferenze ind’è l’Università di Corsica. Si parlerà di a lingua materna ind’u mondu di u pallò ancu direttamente à i ghjuvani ghjucatori: Orlando Forioso di u gruppu TeatrEuropa anderà in parechje associazione spurtive pè parlane. Poi ci sarà ancu qualchi “Olimpiate culturalle” organizzate ind’è a Casa di e Lingue u 21 di ferraghju, per mette in luce i ghjochi tradiziunali bastiacci.

Ma forse c’è un eventu chì c’interessa appena di più à noi appassiunati di lingua, di Corsica è d’Italia. Stu venneri, ind’è a Casa di e Lingue à partesi di 6 ore di sera, si parlerà zeneise. L’invitatu hè Michele Ferroni, cantadore è tecnicu di u sonu natu a Ghjenuva. A particularità di Michele Ferroni, cunnisciutu ancu cù u sopranome di Mike fC, si trova ind’è u so travagliu musicale intorn’à a lingua ghjenuvese, u zeneise. Da a musica d’autore à u rap, Ferroni sublime a lingua di Ghjenuva, fin’à d’esse capace di prupone in lu 2019 un album integralmente in zeneise, “Luxe inti euggi”.

Un artistu uriginale, creativu, cumbattente di a so lingua, dà scopre stu venneri in Bastia.

–

Fonte: Bastia.corsica