Salone di a cicculata in Bastia : un deliziosu successu

So stati trè ghjorni di folìa sott’à u tendone spostu nantu a Piazza San Niculà di Bastia, u loghu di tutt’è feste. Incù un picchju sabatu induvè li sò sfilati più di 6000 visitatori. Maiò, cininni, zitelli, zitelle mamme, babbi, caccari, caccare in fine un populu, incù occhji meravigliati e bocche golose. Nè vulìate cicculate ? Ci n’era à buzeffu di Francia e d’altrò, di Corsica bella sicura. Naturale, biancu, neru, à a nucciola, l’amendula, à u caffè, à a castagna, à u pimentu d’Espellette à e spezie cume u pevaru timut venutu di u Tibetu, o à a bacca di sansho (bacca di l’imperatori) venuta di u giappone . Michel Grobon anzianu capu cucinere di Ronald Regan, Presidente di i Stati Uniti, ha presentatu un fegatu grassu di anatra à u cacao e Ugo Roully à sò copia di l’ Arcu di Trionfu di Pariggi chi l’hà custatu 1500 ore di travagliu e 900 kili di cicculata. A bancarella favurita ghje stata quella di u campione di u mondu Michael Azouz, ma ci ne statu per tutt’à centinaia di spunenti. Stu festivale di sapori s’hè stesu dinò à d’altri prudutti, cume diverse qualità di turrone, di mele, cunfiture, pan di spezie, gelatina di frutti e u pane di u migliore panatteru di Francia.

Ma un c’hè feste senza spettaculi e l’originalità di stu salone ghjè stata a sfilata di vestiti feminile in…. cicculata. Una cunclusione tutta di bellezza, ma quì “era pericolo toccare e mangiare”. Solu u piacè di u sguardu ghjera cuncessu. E u publicu un si n’hè privatu.

—–
Articulu di: Petru Luigi Alessandri