E notte magiche di Patrimoniu

Tramezu à e decine di festivali chì si aprenu d’estatina in Corsica è chì sò tutti di qualità, ch’elli fussinu di teatru, di sinema, o di musica, unu pò esse messu à u capu. Hè « Les Nuits de la Guitare », e Notte di a Chitarra di Patrimoniu.

In stu loghu di a Conca d’Oru fattu si pò dì per e maraviglie, induve u vinu supraneghja i spazi naturali è chi digià hà datu à stu paese un ribombu internaziunale, a chitarra aghjusta un pucarellu di bellezze chì ne face un paese di stelle. È sottu à u celu stellatu, à l’ombra lunare di a chjesa di San Martinu indè a dulcezza di e notte d’estate, a chitarra durente ottu ghjorni, dipoi 33 anni, lampa indè a machja suchjosa è e vigne in aspettu, di fronte à un publicu coltu di piacè, e so’ armunie magiche.

Quì i più celebri musichenti, che qualchi volta e capitale un riescenu à fermà, si sò pusati nant’à a scena è anu fattu sente di Techjime in là a maraviglia di i so’ talenti. Paco de Lucia, Al di Meola, Vicente Amigo, John Mclaughlin, Sanseverino, Gigi Cifarelli, Badi Assad, Paulo Bellinati o dinò Zucchero, Laurent Voulzy, Alain Souchon, Bernard Lavilliers, e tanti tanti altri. È bella sicura i corsi, René Vallecale, Gerard Poletti, José d’Alessi, Lucien Ferreri, Aureliu Mannarini, Antoine Tatich, Sandrine Luigi è quant’altri, quasi trè centu.

A chitarra si sà, omu a maneghja in parechji loghi in Corsica. È in Patrimoniu, più di 50 anni fa, unepochi di chitaristi amatori, virtuosi naturali chì si adunianu à u caffè di u paese per sparte a so’ passione, anu lampatu l’edea di un scontru più stesu. È Jean Bernard Gilormini, chitaristu patrimungnincu amatore ellu stessu, ha incù unepochi di benevulenti, pensatu è messu in assestu e «Notte di a Chitarra» . Ghjeramu in lu 1990. Gilormini ha messu à u serviziu di u festivale nascente e so cunniscenze per riguarà è cunvince di venne in Patrimoniu unepoche di pianete di u strumentu. I primi sò stati Babich, u Reinhart quintet, l’Ensemble de Guitares de Marseille incù u corsu Alexandre Boulanger, Rolland Dyens, Raphaël Faÿs quintet,  Gerard poletti  è u gruppu di corsi cumpostu da Antoine Tatich, François Pesce, Patrick Mattei, è Minicale.

E Notte di a Chitarra di Patrimoniu facenu ogn’estate suffià un ventu musicale novu in Corsica, indè un’ambienza di vicinanza, di spartera, di piacè, di passione, indè a serenita di a notte. È tutti l’anni sò più di 20.000 nant’à a stesa di u teatru di verdura.  Cume a specificava un spettatore, in certi loghi (ancu in America) i musichenti di fama un si ponu vede indè spazi di cuncerti che à un chilometru di a scena. In Patrimoniu pudemu tuccà li. Ghjè un miraculu! St’annu torna e notte patrimugninche anu cunnisciutu u bellu successu. Ringraziemu à Jean Bernard Gilormini…… è che la dura.

Petru Luigi Alessandri