Corsica Genovese : una mostra di memoria in Bastia

St’ottu lugliu c’era à u Palazzu di i Guvernatori Genuvesi di Bastia un’aria di Liguria chi suffiava, accarizata da un sintimu di ritrovu. Cume sè in stu principiu d’estate a storia vulìa fassi un visu novu, più tenneru, menu bellicosu, per firmà più di 200 anni dopu u divorziu, un pattu appaghjatu tra Genuva è a Corsica. Senza scurdacci di nùnda, si hé messu da cantu i “Baccala per Corsica” , e” morte à u nemicu” o e” giustificazione di a rivuluzione di Corsica”. Un s’hè sunatu u cornu per chjamà à l’adunita per cumbatte u genuvese, ma simu stati allegri di fronte à u curteu di u Guvernatore chi hà fattu à so entrata ind’o so Palazzu.

Duie storie s’inticiavanu. Merre, Presidenti di a Giunta Regiunale è di l’Assemblea di Corsica, assessori, eletti di una parte, e di l’altra a replica di u Guvernatore genuvese incu à so corte. Vestiti sfarenti è patrimoniu cummunu. Tuttu què per l’apertura di una mostra d’eccezzione: “Corsica Genovese”. A Corsica à l’epuca di a Republica Genuvese XVesiemu-XVIIIesimu seculi.
A prima mostra nant’à stu tema urganizata in Corsica.”Ci tuccava !” specificheghja Silvanu Gregori direttore di u Museu di Bastia. “Ci tuccava à visità di manera nova a nostra storia incù Genuva”. Si hè riguaratu più di 200 pezzi pigliati in Corsica, inde fondi privati o publichi, inde e chjese di parechji paesi, in cuntinente francese ( museu di u Louvre, castellu di Versailles, musei di Lille, Dôle, Rennes), in Italia, Archivio di Stato di Genuva, numerosi musei di a cità, biblioteca civica Berio, nazionale di Firenze , universitaria di Genuva, Palazzo San Giorgio, parechje cungregazione religiose ecc…
Dipinti di i Doge (Brignole- sale, Giustiniani, acquistatu da a municipalità di Bastia, Pallavicini, Raggi) di famiglie Genuvese di Corsica, opere religiose documenti, carte, piani, libri, scritti, oggetti, mobuli (cume u secretariu di u tresurieru di u guvernatore, Cattaneo XVIIesimu), arme.
Una mostra chì traduce dinò a vita di i corsi in sti tempi genuvesi principiati inde u 1284 dopu a scunfitta di Pisa da i Genuvesi à a battaglia di a Meloria.
Corsica è Genuva un ghje statu solu una storia di cumbatti, di sfrutamentu, di opressione di u populu, ghje stata dinò durente i quasi cinque seculi un legame spessu viulente ma dinò pacificu chi ha mudellatu a nostra identità è c’hà aradicatu inde l’italianità, altra fonte di à nostra cultura.”Ramintassi di sti legami pacifichi incù a Liguria, sera una manera di fighjà di modu più serenu u passatu nostru, di fallu cumbasgià incù u nostru presente per ammane l’avvene” ha scrittu Petru Savelli u Merre di Bastia in presentazione di a mostra.

Corsica Genovese : di l’8 lugliu à u 17 dicembre 2016. Museu di Bastia, palazzu di i Guvernatori Piazza di a Corte in Citadella.

Articulu di Petru Luigi Alessandri