Si chjamava Claude Erignac

Stu 6 ferraghju di u 1998 in principiu di serrata un’omu ghjera tombu ind’ò carrughju d’Aiacciu. St’omu ùn ghjera nè ùn ladru, nè un’assassinu, ùn ghjera ùn cattivu sughjettu, ma solu un’omu, un’omu chi ripresentava u Statu in Corsica. No ùn Statu fascistu, ma ùn Statu demucraticu, a Francia. È ghje per sta ragiò che une pochi l’anu tombu. Cunsiderendu che in Corsica su Statu ghjera ùn Statu d’oppressione.

Un’aghju mai riesciutu à capì cume une pochi d’omi, chi ùn ghjeranu né ladri, né assassini, né cattivi sughjetti  possinu ghjunghje à una tale estremità. Cume ùn penseru puliticu po mutà in una mente ùn  Statu démucraticu  in una magina di ùn populu ? Ancu sè u stessu Statu po cunduce una pulitica che lu si po cumbatte, indè ùn cuntrastu demucraticu. Nùnda ùn ghjustificava st’assassignu. Dipoi 1943, in tempu di guerra, ùn prefettu ùn ghjera statu tombu nanta u territoriu frencese, è tombu da ùn statu nazistu chi occupava a Francia. Stu prefettu ghjera u capu di a resistenza frencese, si chjamava Jean Moulin è cumbattia l’occupente tedeschu. L’ha pagatu di à so vita, cume i corsi Jean Nicoli, Dominique Vincetti, Danielle Casanova, Gabriel peri, Fred Scamaroni è tant’altri chi s’eranu alzati contra l’occupente.

A Corsica indò 1998, ghjera in pace cume oghje. I militenti di qualunche ideulugia pudianu è ponu sempre scrive, mughjà, fà sparte e so idee è dino fassi eleghje. L’assassignu di u prefettu ha sbrembatu une poche di famiglie, quelle di a vittima è quelle di l’assassini. È i corsi per millaie anu sfilatu per dì u so ricusu e dinunzià st’assassignu. A prigiò ha toltu a libertà à quelli chi si vulianu ribelli, per un’altru a prigiò ghje stata à so tomba. Per a famiglia di u prefettu a ferrita ùn s’hè chjosa di sicuru.

Oghje per i 25 anni di st’assassignu ci saranu cummemurazione, omaggi in Aiacciu di fronte à a lapide chi ricorda u Prefettu. U Ministru di l’Internu sarà quì. Ci saranu discorsi. Parechji aspetanu che a pagina si giri, che i rapporti trà u Statu è a Corsica s’appaghjinu. Ma a maggiurità di i corsi, ùn ghje in cunflittu  incù u Statu oghje cume inn’u 1998. U prefettu di à Corsica dorme in terra soia dipoi 25 anni. Ùn ghjera nè ùn ladru, nè un’assassinu, nè ùn cattivu sughjettu. Ghjera solu un’omu chi avia cume funzione in Corsica di ripresentà ùn Statu demucraticu. Si chjamava Claude Erignac.

Petru Luigi Alessandri