« Dicenu à soia » : Un libru di Ghjuvan Carlu Marsily, per un innu à Bastìa

Ghjuvan Carlu Marsily face discorre i corsi ogni ghjornu nanta l’onde di a radiu di serviziu publicu RCFM, incù à so trasmissione Dite à Vostra. Una pausa di più d’un’ora à prò di a lingua corsa. Vecchji e giovani, pumuntinchi e cismuntichi portanu i so parè, à so sapienza di a lingua. E ghje cusi che in 15 anni Dite à Vostra in fendu parla u populu, ha arrichitu a lingua corsa più che n’ha fattu po d’asse l’università .

Ma ghjuvan Carlu Marsily un maneghja solu a parola radiufonica, sà almanaccà dinò l’arte di a fotografìa e di a telecamera. E cusi chellu ha stampatu indè a pellicula, filmati nant ’a Corsica pè a televisiò regiunale. L’arte un si cala mai, e Marsily ci offre ind’u libru ,u matrimoniu di a fiura e di u scrittu per un’ innu à Bastìa. Ha invitatu una centinaia di bastiacci, scrivani, pueti, artisti, persunnalità di u mondu puliticu, medicale, culturale,economicu, spurtivu, religiosu, giurnalisti ecc..à dì a soia nanta sta cità. « Bastia dicenu a soia »ghje u titulu di u so libru. Tutti palesanu u so amore, à so passione per a capitale di u cismonte. Sti testi sò luminati da è fotografìe di Ghjuvan Carlu Marsily, chi un si ferma à u ritrattu classicu e face opera di pittore. Una puesìa di maghjine, e di culori, induvè schiata a bellezza di a cità. Marsily sculpisce i loghi di Bastìa, face sente l’anima di i so viculi, di è so strette. U so occhju d’artistu trascende i casali citattini, chi diventanu cusì palazzi à l’aria di Venezia. Dipinghje una cità in culori sulari chi mettenu in relievu l’italinità di Bastìa, chi appare più Signora. In veru capu d’orchestra Marsily mette in armunìa u scrittu e u vede per cantà un’opera chjamata Bastìa.