Si svoglierà in questa fine di settimana (27-28 di ghjennaghju) una nova edizione di a Festa di San Marcellu in Aleria. Un eventu chì c’invita ad apprufittà di parechje attività, di (ri)avvicinassi à a cultura rurale, è sopratuttu di assiste à una prucissiò singulare cundutta da a Cunfraterna di a Pieve di a Serra.
Ma prima ricurdemeu chì a San Marcellu 2024 hà da cumincià u sabbatu 27 di ghjennaghju, à partesi da 7 ore di sera, cù un’apperitivu, qualchì canti nustrali è dopu, intornu à 9 ore è mezu, u cuncertu di u gruppu “Peakys Band”.
Dumenica mattina versu 9 ore, parechji cavalcadori anu da parte da u locu chjamatu “Mare è Stagnu” per raghjunghje i participenti à a pruccissiò, vicinu à a scola di u Cateraghju. Da quallà, tutti anderanu versu à chjesa di San Marcellu, ind’è a parte suprana di u paese, per a messa è a benedizzione di i cavalli. U cavallu hè daveru u simbulu di sta festa di San Marcellu. Dumenica saranu urganizzate parechje sfide à cavallu, cume u ghjocu di “A Stella” induve i cavalcadori proveranu cù una spada di staccà una stella.
Sempre à dumenica (à partesi da 11 ore), nant’à u campu di a festa, si puderà ottene a ricuniscenza di razza pè i cavalli è/o sumeri corsi, è dinù per i cursini. Poi saranu pruposte ancu qualche dimustrazione di stazzunatura è d’inferratura. Parechji ghjochi saranu aperti à i zitelli, mentre chì per tutt’ognunu ci serà da beie, da manghjà è da cumprà da parechji artisgiani.
Tutti l’aghjornamenti nant’à a Festa di San Marcellu si ponu truvà (in francese) nant’à Facebook. Da parte nostra ci saremu è metteremu nant’à e nostre pagine Facebook è Instagram qualchi ritratti di a ghjurnata di dumenica. Un vi scurdate di seguitaci !
Guillaume Bereni
Di Felce (Castagniccia), è padre di 3 bimbi e lavora sia nell'azienda agricola di famiglia, che produce farina di castagne, sia come redattore freelance, per noi e per altre testate, scrivendo in lingua corsa, francese e italiana.
Petru Luigi Alessandri