A 25esima edizione di A Festa di l’Oliu Novu s’appronta in Santa Lucia di Tallà

Trà i numerosi eventi organizati in Corsica intorn’à i sapè fà isulani, a Festa di l’Oliu Novu hè diventata un appuntamentu immanchevule. I prussimi 6 è 7 d’aprile si svoglierà in Santa Lucia di Tallà a 25 edizione di st’eventu culturale, patrimoniale, testimoniu d’un sapè fà anticu, è attempu mumentu di riflessione giratu versu l’avvene.

A Festa di l’Oliu Novu inizierà u venderi sera (5 d’aprile), cù una serata musicale animata da u gruppu “Les Poulpes Fiction”. Poi pè i dui ghjorni seguenti, a fiera riceverà produttori, artisgiani è vari creatori di tutta a Corsica. Sopratuttu, sarannu presenti produttori d’oliu per farci scuprì tutt’a richezza, a diversità d’issu produttu cusì arridichatu à a terra corsa. Sarà ancu pussibule di visità un mulinu/ecomuseu “U Fragnu”, un olivetu, o di osservà cume si faccia l’oliu ind’i tempi. Pò ci sarà ancu un’esposizione nant’à a storia di l’olivu, una mostra di ferri di tandu (I Ferri di Mariu) e parechji animazione pruposte da U Parcu Naturale di Corsica e d’altre associazione.

Avemu dettu prima chì sta 25esima edizione di a Festa di l’Oliu Novu sarà ancu un mumentu di riflessione nant’à l’avvene. Cunferenze è discussioni sarannu pruposte sabbatu è dumenica nant’à e tematiche di “E nove sfide di u turismu in muntagna”, “L’evoluzione di i paesaghji è di u patrimoniu rurale di fronte à u cambiamentu ambiantale” o ancora “l’agro-eculugia cume strumentu per raghjunghjere l’autonomia alimentaria in un cuntestu di cambiamentu climaticu”. Insomma, una bella opportunità di capisce megliu e nove sfide di u mondu rurale corsu, di riflette nant’à l’avvene che no vulemu pè l’isula.

A 25esima edizione di a Festa di l’Oliu Novu hè tuttu què è forse ancu di più : ghjochi per i zitelli, canti, musica, animazione, tombula… Putete ritruvà tutta l’informazione nant’à a pagina Facebook di l’eventu.

–

Fonte & immagina: A Festa di l’Oliu Novu