I Scontri in caffè incù l’Associu Lingua è Cultura Corsa in Bastia

“ÙN DUMANDA MICCA CIÒ CHÌ U TO PAESE PÒ FÀ PER TÈ, DUMANDA CIÒ CHÈ

TÙ POI FÀ PER U TO PAESE !”

Dipoi u mese di sittembre sò iniziati scontri culturali à u Café du Centre, in Bastia. Sò sustenuti da tutti l’artisti di Corsica è oghje, ancu da u Cunservatoriu di Musica di Corsica Henri Tomasi di Bastia, ch’hà vulsutu diventà partenariu di issi scontri.

Natu da una brama di praticà a lingua corsa, hè statu missu in ballu da l’Associu Lingua è Cultura Corsa, purtatu da a so presidente, un’anziana studiente, Cathy Campana. Stu prughjettu, à pena principiatu, si po dì ch’ellu hè un Riacquistu di l’uralità.

A presidente ci prova ch’ell’ùn hè mai troppu tarda per migliurà si ind’una lingua, ancu à la so età !

À 68 anni, Cathy hà fattu a scelta di studià u corsu uttenendu una licenza è un Master LCC incù menzione, à l’università di Corti. I so studii li anu permissu di scrive in lingua corsa è d’esse publicata, participendu incù d’altri autori, à prughjetti diversi. Assai prisente nantu à a rete suciale Facebook, li piace à sparte incù l’altri. Face intervenzione nantu à RCFM in Dite a Vostra, publicheghja nantu à u situ di l’Associu di Sustegnu Centru Culturale di l’Università di Corsica Interromania di Ghjacumu Thiers, ch’hà accettatu d’esse u cumpare di i Scontri Culturali.

Cathy avia un prughjettu, quellu d’urganizà scontri, dendu si appruntamentu in caffè per fassi una discursata. Eccu quì, un modu novu di tramandera di a lingua, com’è in Dite a Vostra ma di modu presenziale. Hè stata ultimamente invitata à u microfonu di Valérie Franceschetti, in lu ghjurnale di l’associi, per parlà ne.

Ci spiega chì u scopu hè di vene, sia per leghje una puesia, per cantà o simplicemente per fassi una chjachjarata, l’essenziale hè di parlà u corsu. I scontri in immersione si svoglienu ogni sabbatu, à 4 ori di dopu meziornu ed hè gràtisi !

Ogni settimana, si annuncia per u prussim’appuntamentu, u nome di l’invitatu, quellu di u scontru di dumane sarà Jean-Antoine Ferrali, baritonu di furmazione classica.

Ci sò dinù autori, pueti chì venenu à fà scopre o riscopre i so scritti

Si ponu rivede i filmetti di i Scontri nantu à u so spaziu Youtube :

https://www.youtube.com/channel/UC0AXImY0PZkWx48ysN6WBSw

Per esse tenutu à capu di i prussimi Scontri Culturali, ci vole à fighjulà u so prufilu facebook, duve’elli sò annunciati i prussimi invitati :

https://www.facebook.com/cathy.campana

A pagina di l’associu : https://www.facebook.com/profile.php?id=100062864109295

Fonte di l’articulu:

https://www.youtube.com/channel/UC0AXImY0PZkWx48ysN6WBSw

https://www.facebook.com/cathy.campana

https://www.facebook.com/profile.php?id=100062864109295