Sant’Antò o piutostu cume lu si dice in Bastìa, Sant’Untò, ghje podassi a prucessiò chì adunisce u più ghjente. A divuzione à u santu purtughese ghje anziannissima è ricolla à u tempu di l’evangelisazione franciscana di a Corsica.
U cunventu di Sant’Untò in Bastìa ghje situatu nanta l’alture di a cità, è ghje u più vecchju di a Corsica. Fu creatu in 1540 da u padre Mariano da Nebbio originariu di Santu Petru di Tenda. Appartenne à l’ordine capuccinu. Da anni i frati di sant’Untò sò sottu à l’autorità di a Pruvincia franciscana di Sardegna è a maio parte vennenu dunque di l’isula surella.
Stu 13 ghjugnu c’he statu folla à u cunventu, dipoi a mattinata fin’à l’ultima messa di 7 ore di sera. U populu cristianu di Bastìa, in su luni, hà corsu à e ceremonie, in particulare a Messa Parata, celebrata da u vescuvu di Corsica, in presenza di e persunnalità civile. Poi a prucessiò di u dopu meziornu incù e cunfraternite di a cità, è a tradiziunale pausa à a casa di riposu ” Notre dame” per a preghera è a benedizione di i vecchji è di i malati. Ceremonia assai cumuvente. Cume a vole a tradizione lucale a statuà di Sant’Untò ghje stata alzata tre volte prima di raggiunghje u Cunventu è aspettà l’annu prossimu.
A festa di sant’Untò ghje preceduta sempre, da a Tredecina preparatoria. Tempi fà a giuventù di Bastìa c’andava numerosa, occasione indè a dulcezza di e serate di u principiu d’estate di fà qualchi scontri, sottu a prutezzione di Sant’Untò…
—–
Articulu di Petru Luigi ALESSANDRI
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Guillaume Bereni 
Redazione