U Puntettu in Bastia : induve ne simu ?

U Puntettu  di Bastia, incagnatu tra carrughju drittu e vecchju portu  è strintu da a « rue du colle » aperta in 1968, ghje un restu di sta parte di palazzi antichi  chì custituianu unu di i carrughji i più pupulari.  Quì, tempi fà, campava un populu di piscatori, d’artigiani, una folla di ghjente povera è operaia. Stu populu, dipintu inde e cumedie di Vattalapesca (Pietro Lucciana), chi ha datu suchju à l’identità bastiaccia.  A sti tempi U Puntettu ghjera dinò, u carrughju « Rossu » di à cità, quellu di e puttane.

In 1968 a cummissione speziale stallata dopu à  l’annulazione di l’elezzione municipale di Bastia mettìa in opera una decizione di u cunsigliu municipale  scioltu da u tribunale aministrativu di Nizza. U merre di tandu ghjera Ghjacumu Faggianelli (dritta). Una decisione che a nova municipalità di unione di manca presidata da Ghjuvanni Zuccarelli pigliava in contu, andendu aldilà durente quarant’anni per trasfurmà a fisiunumia urbanistica di Bastìa. Una parte di u vecchju Puntettu è  i so palazzi insalubri smarìa per lascia postu à una vìa chi permettìa di favurì u flussu di e vitture. U populu, ellu, migrava versu i carrughji novi di u sud di a cità indè case muderne è à l’affitti suciali. In 2014, a seconda parte di l’accunciamentu di u Puntettu prevista da un’altra municipalità Zuccarelli quella di Emiliu ùn s’hè pussuta fà. U Puntettu,mesi fà, ha tenutu l’altu di e pulemiche tra Municipalità Zuccarelli è l’associu di difesa di u carrughju  ” Salvemu u Puntettu” (sustenutu da i siméunisti). Cunstrati chi hanu occupatu una gran parte di a campagna eletturale di l’ultime municipale. A Municipalità di manca avìa cume pruggettu di distrugge une pochi di palazzi cunsiderati cume insalubri per ricustruili à l’identicu e fà ne alloghji suciali. l’Associu si uppunìa, pigliendu cume ragiò a destruzzione di case storiche cume quella di a famiglia Montesoro. A scunfitta di a Municipalità Zuccarelli dava cusì uno stop à u prugettu di distruzzione.

Ma avà induve ne simu ? “A carissimu amicu” per amintà u dettu pupulare. Una situazione chellu dinunzia Ghjuvanni Zuccarelli inde u so giurnale d’uppusizione municipale. “U nostru prugettu si farà”  assicura a municipalità di Petru Savelli.

Ma per ora  u Puntettu aspetta. A casa Montesoro (certi spezialisti di a storia di Bastìa  a cuntestanu) stà dritta è chjosa indè à so identità storica. Qualchi palazzi oramai murati aspettanu piole e pale. Mancu a municipalità nova ùn hà pussutu salvalli. L’abitenti, elli, so felici. U pocu di u vecchju carrughju  ùn scambia,  è i turisti si teghjanu di fotografìe di stu logu chi fughje u portu vecchju, è prova di  piattassi sott’a  l’ombra generosa di  u giardinu Romieu è di è  gascine di a scalinata Bonavita.

—
Articulu di Petru Luigi Alessandri