L’8 dicembre festa di l’Immaculata Cuncezziò tutte e chjese di Corsica sò in allegria. A Cuncezziò ghjè a festa di a Corsica dipoi che l’antenati hanu decisu in 1735 di eleghje a Vergine Maria Regina di Corsica, è di stampà nant’à tutte a bandere a so figura.
In Bastia indè l’uratoriu di a Cuncezziò carrughju Napuleò c’era a folla di i ghjorni di festa. A Messa parata ghjè stata celebrata da una decina di preti e à a presenza di tutt’è cunfraternite di a cità, è di l’autorità civile. Indè st’uratoriu chi ghjè a più bella capella barocca di Corsica, tutta tapizzata di velutu di genua, si adunìa u parlamentu di Corsica à l’epuca di u regnu anglo-corsu. A statua di l’Immacula Cuncezziò pinta d’oru è chi pesa 600 chili era tutta guarnita di fiori.
Cume ghjè di tradizione durente a messa di l’Immaculata i Preti anu rinnuvelatu a cunsecrazione di a Corsica à a Vergine. “Affidemu a Corsica à à to intercezzione. Libera la di a viulenza, di a curruzzione, e di ogni forma d’esclusione” dice in’oltre a preghera di cunsecrazione chi s’hè cunclusa da u cantu in frencese di u” Chez Nous soignez reine” (indè noi sia te Regina).
Onore à u sacristanu
In fine di Messa c’hè statu una ceremonia particulare per onorà u sacristanu di a Cuncezziò, Gaspare Griffi. U paroccu, u canonicu Casanova li hà rimessu a Medaglia di a Diocesi e u pergamenu ufficiale cuncessi da Munsignore De Germay vescu di Corsica. U paroccu Casanova hà fattu un discorsu di laude per vantà i meriti di Gaspare Griffi sacristanu dipoi 1953.
Ma chi ghje dinò un bancalaru di talentu. L’uratoriu di a Cuncezziò li deve parechji restauri di i so rivestimenti di legnu e ancu altre opere di creazione. Moltu emuziunatu, applauditu da l’assistenza, felicitatu da u cleru e u merre di a cità, Savelli, Gaspare Griffi hà ricevutu, ingiratu da à so famiglia, tutti st’onori di manera umile cume le sempre statu. In cunclusione di a Messa e di a ceremonia U Dio Savi Regina hà rimbunbatu in chjesa cantatu da tutti in l’onore di a Vergine e dinò di Gaspare.
In fine di ghjurnata dopu a prucessiò, amichi, parenti e persunnalità anu fattu onore à u rinfrescu datu, bella sicura, in sacristìa.
—
Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Guillaume Bereni