Sellu si nè crede l’urganisatori, ghjeranu 2000 sabatu dopu mezziornu à manifestà in Bastia per a salvezza di l’ospitale di a cità. Dipoi avà tre settimane une pochi d’impiegati (persunnali medicali, tecnichi o aministrativi), facenu una greva di pattifame per dinunzià a menchenza maiò di mezi per l’ospitale publicu. Ghjè u sindicatu CGT chi ghjè à l’inizativa di sta prudesta.
L’ospitale hà un debittu di più di 20 miglioni, e sella continueghja cusì in 2018 ùn puderà pagà i so furnitori. In più di u debitu c’hè ùn deficit di 50 milioni. U statu per avà ùn vole sente nùnda.E è misure d’ecunumia chellu prevede per l’ospitali anu di sicuru avè cattive cunsequenze. A Corsica hà una prublematica speficica in quant’à a salute. Un’hà micca ospitali universitarii e dunque à so offerta di cure ùn ghje cumpleta. I pazienti so spessu obligati di parte in cuntinente. E difficultà vennenu dinò di a messa in opera dipoi parechj’anni di un novu sistema di finanziamentu di l’ospitali. Un c’hè più dutazione glubale di u Statu e i stabilimenti uspitalieri devenu truvà i mezi per fà solli. A participazione di u statu ghje funzione di u rendimentu di à so attività. Ci so attività più pagate che d’altre in particulare quelle di pocu investimentu in cure. L’altre, quelle di è cure per e malatie grave (cancaru per esempiù) spiombanu è finenze. E ghje cusì che a missione di serviziu publicu di l’ospitale va di male, e che i deficit e i debiti crescenu.
L’ospitale di Bastia u nè po più, e u sindicatu CGT, maggiuritariu, hà decisu un’azzione d’impurtenza incù u patti fame. A manifestazione di sabatu chjamata “marchja bianca” hà ricevutu u sustegnu di tutti i sindicati, partiti pulitichi, numerosi associi, è u Cunsigliu d’Aministrazione di u stabilimentu. A Corsica in stu periodu ghje in campagna eletturale per l’elezzione di a culletività unica, è l’ospitale custituisce una posta in ghjocu impurtentissima.
—
Petruluigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.