Munsignore Marc Alric Vescuvu usiliare di l’arcivescuvatu ortodossu Rumenu di l’Auropa uccidentale ghjera in visita pasturale st’ottobre in Corsica. Hà scontru in Aiacciu Munsignore Olivier de Germay Vescuvu di Corsica poi s’hè spustatu in Bastia. Ind’è e duie cità s’hè adunitu incù e cummunità rumene. Ste cummunità dipoi l’aperture di e fruntiere in Auropa e à a fine di u regime dittaturiale di Ciaucescu, si sò sparperse indè parechji paesi. Un’emigrazione pruvucata da è cundizione precarie à u livellu principalmente di l’impiegu in Rumanìa. In corsica a cummunità rumena conta una millaia di persone in maggiurità giovani chi travaglienu ind’è l’edilizia. Privati di a pussibilità di pudè praticà u sò ritu ortodossu specificu, sò stati accolti inde chjese messe à dispusizione da i catolichi. Ghjè cusì che in Bastia c’hè una messa duie dumeniche per mese, assicurata da un prete di a pruvincia di Marseglia.
A Bastia e messe ortodosse sò dette ind’è a cappella di l’Immaculata Cuncezziò carrughju Napuleò. Un’occasione per i rumeni di scuntrassi e di pranzà inseme in sacristìa dopu à l’uffiziu.
Hè cusì che Munsignore Marc Alric ha celebratu u ritu sulenne dumenica 16 ottobre in presenza di parechji fedeli, non solu rumeni ma dinò corsi.Un gestu ecumenicu d’accuglienza.
—–
Articulu di Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione