L’Ora bastiaccia di u sinemà talianu

C’hè un appuntamentu chì i bastiacci ùn mancherebenu per tuttu l’oru du mondu, ghjè quellu di u festivale di u filmu talianu. Dipoi 29 anni à l’istessa epica, i primi di ferraghju, Bastia si mette à l’ora taliana. In fine, accende ùn pò più a so fiamma di talianità. Perchè da sempre, Bastia un’hà sguassatu stu legame strintu incù a terra ferma penisulana. U dettu ghjè cunnisciutu : “da capi corsu à Bonifaziu, aria di Roma è Mare di Laziu”. E stu festivale venne à puntu per, in qualchi modu, firma sta fame, è un c’hè micca che e salle oscurre chi facenu festa , i tavulini di e tratturie st’anu in apidittu. I Menu bastiacci elli dinò, si mettenu à l’ora di a gastrunumìa stivalese. Pastasciute à quantità, osso bucchi in allegru, Provoloni, Parmiggiani, è Gorgonzola sò in cartellone. Per una settimana si guarda, si sente, si parla è si manghja talianu. Ma u Rè di stu Menu ghjè u sinemà, è so parechji à tichjassine à buzeffu.

A u prugrama di l’edizione 2017 c’hè 12 filmi in cumpetizione. Parechje opere so state già premiate da d’altri festivali cume “La Pelle dell’orso” di Marco Segato chi hà ricevutu u Grand Premiu di u festivale d’Annecy 2016 è u Premiu di u Publicu di u festivale di Tolosa 2016, o “Piuma” di Roan Johnson, Premiu di u Publicu di u festivale di Villerupt 2016, “La ragazza del Mondo” di Marco Danieli Premiu di a critica di u festivale di Tolosa 2016 è Premiu di a Ghjurìa di i giovani di u festivale d’Annecy 2016.

Sette filmi so prugramati fora cumpetizione. E poi un omaggiu st’annu à u grande Alberto Sordi chi quasi 20 anni fà in 1999 ghjerà ghjuntu à salutà u festivale di Bastia. Dui filmi à l’affissu : “Il Boom” di Vittorio de Sica giratu in 1963 è “Il Vigile” di Luigi Zampa di 1960.
Indè u peristiliu di u teatru ci sò duie mostre . “Isole d’Inverno” fotografìe di Federica Di Giovanni. Nativa di l’isula di Ponza ci dà un invitu à a scuperta di l’isule minore di l’Italia. Una mostra sotta u patrunatu di u Cunsulatu generale d’Italia è l’istitutu Talianu di a Cultura di Marseglia. U “Centru Cinema Città” di Cesena in Emilia Romagna presenta “CliCiak 2016 Concorso nazionale per fotografi di scena”. Sta mostra spone l’opere di una quarantina di fotografi, scelte nanta e 1500 di u cuncorsu 2016.

In fine ùn c’hè festivale senza cunferenze. Quellu chi hà iniziatu ghjè statu Ghjan Marcu Olivesi Direttore di u Museu di a Casa Bonaparte in Aiacciu. Hà parlatu di ” di U Rè Luigi Decimu quartu, Napuliò è a Roma antica : una sfida pulitica”. Seguita l’11 ferraghju u storicu Alanu Tapiè chi evucherà ” Da Tiziano à Caravaggio, l’allegorìe vere”. Eccu a sfida di u festivale 2017. So centinaie à frequentà ogni ghjornu u teatru è e salle di a cità per bagnassi indè unu di i più maio cinema di u mondu : U talianu. E cume l’hà scrittu Petru Savelli u merre di Bastia amintendu Roberto Benigni : “L’Italia ghjè l’unicu paese di u mondu induvè a cultura ghjè nata prima di a nazione”.

—
Petru luigi Alessandri