Bella iniziativa di l’associu di u patrimoniu di Bastia per a ghjurnata eponima stu 17 settembre. Facìa qualchi anni che l’organu storicu di a cattedrale di l’Assunta Gloriosa un’avìa sunatu sott’à mane di musichenti celebri. Stu settembre u viotu ghje statu colmu da l’organistu di fama internaziunale Paolo Bottini. Natu à Cremona ghje titulare di a tessera prufeziunale di l’organisti di a diocesi di Pariggi chi li ha permessu di tenne l’organu “cavaillé coll” di a chjesa di a Trinité di a Capitale frencese. Paolo Bottini accumpagnatu da Piergiuseppe Doldi tromba principale di l’orchestra di a Fenice in Venezia, hanu incantatu un publicu numerosu chi un’ha micca cuntatu i so applausi. In cartellone c’eranu opere di Verdi, Padre Davide da Bergamo, Gabrielli, Ponchielli, Clarke, Petrali e Vivaldi. Mumentu deliziosu che di sente sunà u Serassi di Santa Maria. Unu di i più belli e pochi organi in Francia di i Fratelli Serassi da Bergamo casa oramai sparita.” Ma u Serassi puterebbe sta mutu per sempre sell’ùn si intraprende un restauru maiò” cusì ha dettu Paolo Bottini. E stu cuncertu ghje statu organizatu à l’occasione di l’operazione di restauru. U strumentu classificatu Munumentu Storicu ghje l’opera di i Fratelli Serassi da Bergamo casa celebrissima à l’epuca .Ghje statu inauguratu u 15 ghjennaghju di u 1845, da Francesco Pezzoli organistu di rinomina ellu dinò originariu di Bergamo. U Serassi ghjera statu fabricatu un’annu prima, a firma ghje di u 1844. A custatu 4000 franchi, e sò i fratelli Lazarotti di Bastia chi hanu fattu l’avanzu di i solli. Unu di quessi, Sebastiano, chi ghjera merre di Bastia ha pagatu a custruzzione di a tribuna chi suporta u strumentu. U cuncertu ghjera statu precedutu à u Teatru da duie cunferenze, una data da Federico Lorenzani presidente di l’associu culturale Giuseppe Serassi, e l’altra da Elisabeth Pardon di l’associu Rinascita di l’organu Corsu. Cunferenze nanta u tema di i Serassi.
A u nome di i Fratelli Serassi ghje assuciatu quellu di Felice Moretti chjamatu Padre Davide da Bergamo, monacu , organistu e cumpositore famosu di musica d’organu di l’800 . L’opera di u Padre Davide ghje immensa e ha cuntribuitu à fà cunnosce l’organi Serassi. U più celebre ghje quellu di Santa Maria in Campagna di Piacenza strumentu nanta u quale sunava e cumpunìa u Padre, e chjesa di u cunventu induvelu campava. l’organu di L’Assunta Gloriosa di Bastìa s’assumiglia assai à quellu di Piacenza dice u Maestro Bottini chi cunnosce bè u strumentu di u Padre Davide per sunacci spessu. A a fine di l’ottucentu a casa Serassi sparìa dopu avè fabricatu più di 700 organi di u 17esimu à u 19esimu seculu per chjese di Liguria Piemonte, Lombardia e Emilia Romagna in particulare, ma dino in Toscana per a Basilica di San Lorenzo di Firenze. U Serassi di Bastìa pussede tutte è caratteristiche di a tradizione organistica taliana. Ghje un gioiellu di u patrimoniu cittadinu bastiacciu chell’ùn si pò lascià morre.
—-
Articulu di: Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.