Castellare di Casinca : Litteratura à a Funtana

Iniziativa originale st’estate pigliata da l’associu  ” Castell’art” e à so presidente Henriette Massoni, per à so prima manifestazione culturale, quella di traslucà in piazza di u paese di u Castellà di Casinca a platea di a trasmissione di u canale di televisiò France5 “la Grande Librairie”incù u so animatore François Busnel, è una di e più note scrivane francese di oghje : Delphine de Vigan. L’autora ricunisciuta da i lettori frencesi, ha ricevutu unepochi di  premii litterari naziunali maio cume u “Prix Renaudot”,  “Prix des Libraires” o u “Goncourt” di i liceani. Delphine de Vigan ha scrittu una decina di rumanzi : “jours sans faim”, ” les heures souterraines”, “No et moi”, “d’après une histoire vrai”, “rien ne s’oppose à la nuit”……Parechji di i so rumanzi sò stati adatatti à u cinema . François Busnel animatore di a “Grande Librairie”ghje un giunarlistu litterariu celebre. Ha travagliatu in stampa scritta ( l’express”) à u mensile “Lire”, in radiu  à “France Inter”. Ellu dinò ghje scrivanu (Mythologie grecque, les mots du pouvoir, le temps) e scenaristu di filmi. Stu scontru litterariu castellarese, à u calà di u sole,ghje statu un veru piacè, e un veru successu. Ha participatu un publicu numerosu e cunnuscitore chi ha fattu nasce  dialoghi,  scambii,  cuntrasti interessenti  incu l’invitati. Intornu à a vecchja funtana di San Bastianu, accumpagnatu da u frusciu di l’acqua ha suffiatu durente più di due ore un traghju pueticu, un aria di parole chi hanu, in qualchi modu, incantatu stu loghu. Si pudìa dinò visità una mostra di dipinti, e un mancava di chè manghjà. Indè  u paese di u Pueta Maschetti, st’iniziativa ha pigliatu un sensu di rinovu culturale, s’aprendu  nanta spazii chi sortenu di “u suminatu”di manera originale e intelligente.

I paesi so troppu spessu spenti à stu genere di manifestazione culturale, e Castell’art deve esse incuragita per prussegue l’esperienza. Si sà che Castellare di Casinca ospita à u mese di maghju una di e più vecchje fiere di corsica quella di San Brancà, sott’à l’ombra di una di e più anziane basiliche rumanesche di l’isula. Incù stu novu appuntamentu litterariu, l’associu Castell’art,  arrichice dunque u Patrimoniu pupulare e artisticu di u paese.

—–
Articulu di Petru-Luigi Alessandri