A visita in Corsica di u Ministru di l’Adeguamentu di u Territoriu e di è Culletività Jean Michel Baylet s’hè compia marti à u Cunsigliu Dipartimentale di u Cismonte in Bastia dopu un giru in Calenzana in Balagna.Una visita chi avìa cumminciatu lunì in Aiacciu.
In Bastia u Ministru ha firmatu duie cunvenzione incu Frencescu Orlandi u présidente di u Cunsigliu di u Cismonte à prò di A casa di i Servizi Publichi é di a Posta. A vigilia in Ajaccio ghje statu ufficializatu u cuntratu di pianificazione tra u Statu e a Regione. Cuntratti chi purterannu indè l’ecunumia regiunale naziunale più di 30 milliarde di euro. Per a Corsica, sò più di 150 millioni .
Ma u piattu principale à u Menu di sta visita ghjera a messa in opera di a prossima Culletività Territuriale Unica chi duverebbe nasce u 1mu ghjennaghju di u 2018 dopu à l’elezzione di dicembre 2017, e dopu spariti i dui cunsigli dipartimentale di u Cismonte é di u Pumonte.” L’ora di e discussione ghje compia avà ghje venuta l’ora di a cunclusione” ha dettu u Ministru. Ma à sò visita e i sò discorsi un’hanu fattu scambià i parè di i pulitichi. Nimu una sviatu di è sò pusizione. I naziunalisti di è duie tendenze sò d’accunsentu cume a manca non cummunista, ma è sò dumande e è sò pruposte so sfarente. A dritta e i cummunisti so contra ma incù ragiò diverse.
A dritta face focu contra u prugettu “chi cuncentrerà i puteri senza cuntrarii.” “Ghje ùn cattivu colpu purtatu à a Corsica” dice u senatore Ghjuvan Ghjacumu Panunzi chi vuterà contru à u Parlamentu cume u so cullegha deputatu Laurenzu Marcangeli merre d’Ajaccio. Vuterà contra dinò u deputatu Gandolfi-Scheit merre di Biguglia. E sè a dritta piglia u putere à u livellu naziunale in 2017 l’ha annunziatu : “un ci sera culletività unica” in tutti casi micca cume quella pruposta da u guvernu attuale. Contra sta Culletività so dinò i cummunisti, chi ramintanu che in lugliu 2003 u populu corsu avìa vutatu No à u riferendum urganizatu nanta un stessu prugettu, tandu prupostu da u Guvernu di dritta. E volenu torna che u populu corsu sìa interrugatu per vìa di un riferendum. “Incu sta culletività avemu da fà un Rè di Corsica” ha dicchjaratu Dumenicu Bucchini anzianu Presidente cummunistu di l’Assemblea di Corsica.
Autunumisti Simeunisti, e independentisti Talamunisti sò d’accunsentu incù u prugettu ma ùn ci trovanu i so conti à u livellu economicu e fiscale. A manca non cummunista sparte u parè di l’accunsentu, ma sè i sucialisti approvanu, i radicali so mezu che suddisfatti, vulìanu un’equilibriu territuriale più fermu. E u Ministru Baylet di cunclude à a fine di sta visita: “Chiede sempre per avè sempre, què ùn ghje a demucrazìa. Eo aghju fattu u mio travagliu”. A settimana chi s’apre l’Assemblea di Corsica vuterà nanta e pruposte di l’ordinenze, è ùn si sà sellu ci sera una maggiurità à prò, in quanta à l’Assemblea Naziunale listessa interrugazione si pone.
——
Articulu di : Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione