U Parcu Marinu di Capi Corsu hè natu

A ministra di l’Ambiente francese Segolène Royal hà firmatu stu 15 lugliu u decretu di creazione di u parcu marinu di u capi Corsu. A firma ufficiale s’hè fatta in Erbalonga (cumuna vicinu à Bastia) induve a Ministra ghje stata accolta da u merre Dumenicu Ricci. Presenti dinò u Prefettu, i Presidenti di a Giunta Regiunale (Cunsigliu Esecutivu), di l’Assemblea di Corsica, di u Cunsigliu Dipartimentale di Corsica Suprana, a Presidente di l’uffiziu di l’Ambiente e  i merri capicursini. Stu parcu chi inserisce dinò l’Agriate, custituisce una nova uppurtunità di prutegge in corsica i spazii marini è di terra ferma. U parcu marinu di u capi corsu ghje l’ottesimu parcu naturale francese è hà una superficia di 6830 kilometri quadrati. Ghje u più grande di a metròpuli.

U parcu hà sei urientazione di gestione : favurì a cunniscenza di i spazii litturali e marini di u capi corsu è di l’Agriate, sensibilizà e accumpagnà e ghjente, prutegge o ancu restaurà l’ecosistemi marini e litturali, cuntribuì à l’evaluazione e à a qualità di l’acque, creà e intrattene l’attività prufeziunale è ludiche, è in fine riscopre a cultura marittima lucale è trasmette a passione di u mare.

Bastia, chì avìa chiestu à fà parte di stu parcu ghje, diceremu, in lista d’attesa favurevule.

U mare di u Capi Corsu ghje riccu, in particulare distese di pusidunìe, di pesci cume u dentice o l’arigostia, di ottu spece di cetaci, di tertughjine marine,di 26 ettare di curallu  ecc…

A u largu di e coste di u Capi Corsu (ind’è u canale di Corsica) passanu ogn’annu 18000 navi e c’hè tre porti di piacenza chi pruponenu 1760 posti. Ma a pupulazione ghje poca, 10 000 abitanti per 27 cumune,  multiplacata per 5 in estate.

Ma a visita di Segole Royal ghjè stata accurtata per via di l’attentatu sanguinosu di Nizza. A Ministra arrivata in principiu di matinata ghjè partita  versu meziornu.

—
Articulu di: Petru Luigi Alessandri