U GFCA cede di fronte à Parighji (2-3)

Imbattevule durante i dui primi sets, u GFCA hà lasciatu filà un macciu ch’ellu duminava estesamente! L’Aiaccini compianu in quinta pusizione, è si spostaranu ind’è a capitale in casu di macciu d’appughjatoghju. Prossimu appuntamentu l’8 d’aprile in Parighji nanzu un ritornu chi s’annunzia caldissimu!

Per iss’ultima fasa rigulara, l’imbusca hè assai impurtante per l’omi di Fred Ferrandez. Una vittoria 3-0 o 3-1 hè sinonima di macciu ritornu è in casu di bisognu un macciu d’appughjatoghju di fronte à u so aversariu di u ghjornu in quartu di finale di i « Play-offs ». Oltru iss’aspettu, u Gazelec pensa bè duminà psiculugicamente u so aversariu. Ind’è stu genaru di scontru, u primu set raprisenta un’impurtenza capitale. U GFCA mette i boni ingredienti per fà dubbità l’aversariu chi ùn hè micca ind’è una bona perioda (6 punti nant’à i sei ultimi macci è quattre disfatte cunsecutive à dumicile). Ma i Parighjini anu da mustrà ind’è issa prima partita chi ùn so micca vinuti in vittime.

Ogni squadra s’hà da rende colpu per colpu. A stu ghjocu, hè Parighji chi piglia una piccula avanza à u primu tempu mortu tecnicu (7-8). Ma à a fervore di una ricevuta solida induve Jeff Exiga hè brillante è di un block intebe, u GFCA rincolla assai prestu (9-9, 10-10). Si sente chi u cullettivu Aiaccinu hè in misura di piglià a suprana, ma cummette paradussalamente, sbagli diretti chi permettanu à i ghjucatori di a capitale di spicciassi à u sicondu tempu mortu tecnicu (13-16). I serivizi di Gergye fanu torna male à a difesa Aiaccina (14-18). U Gazelec riesce à rincollà in partita ma hè Parighji chi ripiglia i davanti à u money-time (17-20). Mumentu sceltu da i Diavuli Rossi per sorte u so ghjocu. Risultatu, un + 4 cù un missile è un contru di Dailey (21-20). Eccu chi ci dà una fine di partita epica (21-21, 22-22, 23-23). Un sbagliu di serviziu di Mineiro dà una palla di set à i Parighjni. Hè salvata da una magnifica attacca di Simovski! Daretu, Morgado accerta à u serviziu è Petreas cunclude a partita incù un contru maestrale (26-24).

D’intrata di siconda parte, u Gaz si face surprendre da l’aversariu (1-3, 2-4 , 3-5, 4-6). Simovski è Mijalovic si carganu di fà rincollà u punteghju (6-6). U Gazelec piglia ancu i davanti à u primu tempu mortu tecnicu (8-7). Un’avanza chi l’Aiaccini anu da fa cresce. I Parighjini si ne rimettenu più à a cuntesa cà u ghjocu; un cennu è una debulezza. U GFCA ne tira vantaghju, incù un Simovski maio (16-12). U tavo hè fattu è, purtatu da u so publicu u GFCA svulazza, tantu ind’è u ghjocu chi mentalmente (18-13). Parighji prova di vultà ma ùn riesce tantu è, u GFCA cuntinueghja à piglià avanza à u money-time (20-17). L’aversariu resiste incù l’assalte di Sens (21-20,22-20,23-21). E u Palatinu averà u dirittu à una fine di set eccezziunale ma affligente per i narbi. Prima Mineiro offre trè palle di set à u Gaz. Ma Parighji volta torna (24-24). Ind’è l’ancata l’Aiaccini averanu trè nove palle di set, ma l’aversariu ùn lascierà micca l’affare (25-25,26-26-27-27). Petreas salva a sola tentativa Parighjina (27-28). Un contru di Simovski è un sbagliu di Kaba nant’à un serviziu di Takaniko liberanu u Palatinu! (30-28). 2-0 à u rifiatu, u male hè fattu per i Parighjini chi paranu tremà! Testimone, dui sbagli diretti nant’à un serviziu appena u ghjocu principiatu. U GFCA ne sà prufità (4-1, 5-2, 6-3, 7-4) per esse in capu à u primu tempu mortu tecnicu. A ricevuta hè allora un veritabile puntu forte per u cullettivu Aiaccinu, chi permette di mantene u scartu. Jeff Exiga face splende a so squadra (16-10). Cridimu chi i ghjucatori di Rougeyron so accucculati! Ma facenu un incredibule ritornu incù un +7, è piglianu e cumande (18-21) sin’à esse davanti à i diavuli rossi (23-22). Un’attacca di Sens offre duie palle di set à i ghjucatori di a Capitale chi riescenu sta volta à cunclude nant’à a siconda (23-25). Oramai a missione di l’Aiaccini hè di evità un tie-break! U Gazelec deve fà sforzi di fronte à l’aversariu chi hà ripigliatu fidanza (3-2,4-3,5-4). Ma i contri di l’Americanu Holmes facenu male (7-7). Ind’è stu mumentu affligente, l’Aiaccini anu bisognu di una bona ricevuta di Jeff Exiga (11-8, 12-9, 13-10…). Ma Parighji ùn lascia nunda è piglia i davanti à u sicondu tempu mortu tecnicu (14-16). Un vantaghju chi i visitadori anu da cunservà sin’à a fine. Dui sbagli diretti Aiaccini li danu ancu un +3! Pinhero piglia un rossu (puntu di penalità), Parighji stà davanti (17-21). Ind’è una fine di set assai difficiule induve i ghjucatori di a capitale sembranu nerbosi, u gfca hà u meritu di ùn lascià nunda! Ricollanu (19-21, 20-22, 21-23) mà ùn impediscesi l’omi di Rougeyrondi parighjà à dui set dapertuttu (23-25). Per l’Aiaccini chi anu dunque da riceve Parighji in macciu ritornu di i « play-offs », ci vole ripurtà a vittoria! U tie break si passa nant’à un ritmu assai allevatu, è stà assai indecisu. A l’imagine di u scontru. I Parighjini so più solidi à a ricevuta è più forti ind’è a so attacca incù Kaba (7-8). Eppuru, u GFCA hà da truvà e risorze mentale è fisiche per piglià torna un’avanza (11-9, 12-10, 13-11)! Torna una volta i Parighjini ùn lascianu nunda è pareghjanu incù un « ace » di Gergye (13-13), chi s’offre dui servizi vincitori (15-13).

Volley 22es ghjurnata
Salla di u Palatinu
GFCA-Paris
Evozione di u punteghju : 26-24 (28’), 30-28 (33’), 23-25 (30’), 23-25 (31’), 13-15 (16’)
Spettatori : guasgi 800
Arbitri : MM Daragon et Morchoisne

GFCA
Simovski (cap.), Takaniko, Pétréas, Dailey, Mijalovic, Mineiro- Libero : Exiga- ent : F. Ferrandez

Parighji
Holmes, Paese, Kreek, Pinhero (cap.), Sens, Gergye- Libero: Koga – ent: J.Daniel

—
Autore : Antoine Astima nant’à CorseNetInfos
Traduzzione : Eva Bernard
Ritratti : Marcu-Antone Costa