25 anni ! U 5 maghju di u 1992 a Corsica cunniscìa a so prima grende catastrofa spurtiva. U stadiu di Furiani vicinu à Bastia chi accuglìa à meza finale di a cupa di Francia di ballò, si mutava in morti e ferriti. A partita chi uppunìa l’OM di Marseglia à U Sporting di Bastia si finìa incù 18 morti e più di 2500 ferriti. A tragedia a più maiò accaduta in Francia indè un stadiu.
Dipoi 25 anni ogn’annu à u 5 di maghju Bastia è a Corsica si ricordanu. E pè fàssi ricurdà a Francia sana c’hè vugliutu cumbatti e trattative incù diversi Guverni e a ligua naziunale di football.
Finalmente dipoi annu u Guvernu Francese cedìa di fronte à a vuluntà di u Culletivu di u 5 Maghju. Un ci s’erà partite di ballò stu ghjornu, ma solu sellu casca in sabatu, e l’altri ghjorni ci s’era un omaggiu naziunale indè i stadii di Francia e una ceremonia naziunale à u Ministeru di i sport.
Stu 5 maghju sottu à un sole frescu di un veranu incertu, una ceremonia s’hè svolta à u munimentu di u ricordu in Furiani vicinu a u stadiu, à u loghu induve a tribuna di i spettatori s’affundava. Vittime, famiglie di i smariti, autorità pulitiche spurtive è religiose, ripresententi di e culletività, squadra di u sporting, ripresententi di a stampa (prufessione assai tocca per a strage), è a pupulazione si sò aduniti per spone mazzuli di fiori e fà silenziu di fronte à un munimentu di u ricordu restauratu e imbellitu.
A seguitatu una messa in memoria di i morti, celebrata ind’è a cattedrale di l’Assuntata Gloriosa da Munsignore Pinelli Archiprete è un numerosu cleru.
25 anni che u ballò corsu porta a ferrita di quelli chi so stati arrubati à a vita allora chelli eranu andati à gòdesi a gioia di u sport.
Petru luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.