Stonda di fede è d’amicizia in San Bartuli, Orezza

Ogni 24 d’aostu, pè sta Castagniccia, ognunu si prepara à una caminata in muntagna sin’à a cappella di San Bartuli. Aldilà di l’orezzinchi, sopratuttu quelli di i paesi di a Parata, di e Piazzole è di a Monacia, affiancati à i monti dà duve a cappella supreneghja i valli, si ritrova ghjente di l’Ampugnani, di l’Alisgiani, di a Tavagna o di u Morianincu, pronti à sparte una stonda di fede è d’amicizia.

Sè tutti i chjassi portanu a Roma, quelli di stu rughjone passanu sempre pè San Bartuli. Ma st’incontru in ‘ssu locu muntagnolu meravigliosu, c’è quantunque bisognu guadagnasselu! Ci vole caminà più di un’ora sè si colla pè a Parata o a Monacia è, secondu l’età è a capacità di ciascunu, duie o tre ghjunghjendu d’altrò. Per quantu ci riguarda, avemu seguitatu per guasi duie ore u chjassu chì parte da Felce in Alisgiani, cume sempre da oltre 30 anni, cume l’avianu seguitatu i nostri genitori è antenati. A caminata hè parte di stu “viaghju” versu San Bartuli: ghjunti nant’à e creste, a natura ci rigala quella vista meravigliosa nant’à u Tirreniu da una parte, l’Orezza è u San Petrone da l’altra. Passemu pè sti lochi chì da tandu in tandu anu un nome assai speciale. Si sarà daveru lampatu da una teppa un religiosu, in stu locu chjamatu “u salt’à u prete”? E pò ghjè megliu d’ùn pensa chì, appena più nanzu in ghjò, c’è un altru postu chjamatu “Frate Mortu”…

Ghjunti in San Bartuli, c’era digià appena ghjente. Forse si ne aspettava appena di più, vistu ch’era sabbatu, è ch’avemu cunnusciutu sta festa cù centinaie è centinaie di persone. Qualcosa sarà cambiatu mà un vale a pena di lamentassi perchè u più impurtante ghjè ch’elli ci sianu quelli chì, per fede è per essezza, fanu di quellu ghjornu un mumentu piacevule è felice. A messa hè cuminciata appena nanzu 11 ore. A piccula cappella era piena di mondu, d’altri seguitavanu fora in (rilativu) silenziu. I canti sacri anu accumpagnatu a messa, cunclusa cù un Dio Vi Salvi Regina cumuvente di bellezza. Poi hè stata purtata in prucissiò a statula di San Bartuli. A nebbia avia già cuminciatu à ricopre a cappella è u so circondu, cume sempre pè ‘sse muntagne in questa fine d’aostu.

Dopu a messa era ghjuntu u mumentu di a festa. Vicinu à u bancu, si è ritruvatu tutt’a ghjente chì, ognitantu, ùn si era più vista da l’annu scorsu. Si discuta, si canta da una parte di u bancu à l’altra è, bella sicuru, si beie (cù moderazione). Eppoi, da l’altra parte di a cappella si ritrova cume sempre i pastori di a famiglia Grisanti, fideli à sti lochi è impegnati in lu so travagliu, rigalendu sempre una bella stonda di gustu cù qualchi bugliticcia. A San Bartuli hè festa, fede, tradizione, amicizia. E ghjè ancu unu di sti lochi induve si parla sopratuttu corsu! Pò sembrà stranu di dilla cusì, ma ghjè ancu stu piacè di pudè ascultà, parlà, cundivide semplicemente, chì ci porta ogni annu cù piacè nant’à i chjassi di San Bartuli.