Iniziati in lu 1999 in Pedicroce, altru paese orezzincu, i scontri pulifonichi Corsica-Sardegna si sò spostati dapoi 12 anni in quellu paese di Rapaghju. Appoghjatu da a municipalità, ghjè u gruppu Madricale chì stà organizandu ogni annu questa festa. Creatu in l’anni 90 da Iviu Pasquali (chì ghjè ancu u presidente di l’Associu di a Guardia Corsa Papale), u gruppu Madricale hè assai legatu à a terra di Castagniccia è investitu per mantene un rapportu tradiziunale è sputicu cù u cantu. “Per noi l’alma corsa è u cantu in paghjella si devenu di campà in lu so ambitu naturale è muntagnolu di Castagniccia” ci hà dettu Iviu.
Sti scontri pulifonichi mettenu in luce u spiritu di a Corsica muntagnola, è dunque anche a fratellanza cù i Sardi. Ogni annu, parechji cantadori venenu da a Sardegna per fà sente a so voce, ma a volte sò presenti anche rappresentanti d’alti populi: “Sò numerosi è d’alta qualità i gruppi sardi a esse venuti, ma avemu ancu fattu vene baschi è dà poi annu scorsu, Georgiani”, ci spiegha Iviu Pasquali. Ancu quist’annu sarà presente un gruppu venutu da a Georgia, chjamatu “Marani”. I Sardi saranu rappresentati da u “Cuncordu Seneghesu”, mentre chì ci saranu dui gruppi di Corsica: Madricale, bella sicuru, è “Fiara Nova”.
I 25 anni di i scontri pulifonichi Corsica-Sardegna saranu festeghjati stu sabbatu 22 di ghjugnu, à partesi di 6 ore è mezu di sera, in Rapaghju d’Orezza. “Sti scambii si facenu in tutta fratellanza è amicizia” ci ricorda Iviu Pasquali. Auguremu à tutti, cantadori cume ascultadori, una bella stonda di pulifonia è d’amicizia!
–
Ringraziemu à Iviu Pasquali per a so disponibilità è per i ritratti
Guillaume Bereni
Di Felce (Castagniccia), è padre di 3 bimbi e lavora sia nell'azienda agricola di famiglia, che produce farina di castagne, sia come redattore freelance, per noi e per altre testate, scrivendo in lingua corsa, francese e italiana.
Petru Luigi Alessandri