Cume di solitu ogni 27 aprile, Bastìa ha festighjatu Santa Zita patrona di i giardinari, e serve é i campagnoli. Santa Zita ghje una vecchja tradizione purtata da i tuscani immigrati, chi venianu inde u circondu bastiacciu per fà i campagnoli, cultivà orti é giardini. Numerosi eranu di u circondu di Lucca é so elli in 1833 chi hanu custituitu a sucietà mutua di succorsu Santa Zita. A sola, po dassi, chi esiste sempre in Corsica. In ricordu di a santa di Lucca nascìa cusi in Bastìa a divuzione à Zita chi si perpetua oghje.
E Bastìa ghje a sola cità di corsica à festighja Santa Zita unita cusì ogni 27 aprile à San Frediano di Lucca induv’ell hè cunservata a salma mummificata di Zita.
St’annu a festa ha pigliatu un’andatura più sulenne incu a presenza di Munsignore Olivier de Germay vescuvu di Corsica. Ma u ritu ùn’ha scambiatu dipoi più di un seculu é mezu.
Prima di a messa u Presidente e i soci di Santa Zita so andati à circà u merre é u cunsigliu municipale in Municipiu per accumpagnalli, bandera Zitana in testa, in chjesa, secondu un’ antica usanza tuscana. Dopu a messa, a statua fiurita di Santa Zita ghje stata purtata in prucessiò inde i viculi di u vecchju carrughju di u mercatu. In su fra tempu so distribuiti mazzuli di fiori benedetti. E ceremonie si sò cuncluse per u Santissimu Sacramentu, é dopu avè alzatu quattru volte Santa Zita in direzzione di i quattru punti cardinali, cume à vole à tradizione corsa.
E cume in ogni festa, un rinfrescu ha adunitu cunfratelli, preti, é participenti in l’onore di Santa Zita.
——-
Articulu di Petru Luigi ALESSANDRI
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Guillaume Bereni 
Redazione