San Ghjuvà in Bastia: U ricordu di i fucarè spariti ma a fede sempre presente

Tempi fà, affacatu ghjugnu, Bastia s’appruntava à festighjà San Ghjuvà. E bande di sgaiuffi di i carrughji curianu a cità per riguarà tuttu cosa pudìa brusgià, taulette, vechji mobuli, cartoni ecc… Tandu, ogni carrughju bastiacciu facìa u so fucarè.

E cadaste di legni messe à bor’ di mare per i quartieri di a marina, u vechju portu è e capanelle, o nant’à qualchi piazze per Lupinu è San Ghjisè eranu tenute in guardi’à vista ghjornu è notte, temendu una brusgiatura di i cuncurrenti d’altri carrughji. Ognunu vulìa che u so fucarè sipii u più maiò, che à so fiacula sipii a più bella per festighjà San Ghjuvà è a venuta di l’estate. A e cime di ste cadaste di legne era postu un spaurachju ripresentendu una persunnalità di a cità o di u paese, pocu simpatica. A sera di u 23 a cità s’illuminava di mille fochi. È i campanile di e chjese scampanelavanu à più pudè. Bella sicura ghjera u fucarè di u vechju portu, locu di a chjesa di San Ghjuvà chì cunniscia più successu. Per San Ghjuvà principiavanu i bagni “perche u mare ghjera benedettu”.

Oghje sta tradizione hè sparita. Un ci ferma più che un solu fucarè furnitu da a merrìa, dipoi parechj’anni, per che a fiacula di a tradizione ùn si spegni. Un fucarè postu à u vechju portu, locu simbolicu. Ma San Ghjuvà ha persu u so soffiu pupulare tenutu da decenni da i zitelli bastiacci di i carrughji. Oghje a San Ghjuvà tenne sempre u so caratteru religiose. È a chjesa à i dui campanili chi surveglia u vechju portu, è chi ghjè a più grande di Corsica, ghjera colma di fedeli stu 24 ghjugnu per assiste à a messa parata celebrata da u cardinale Bustillo, è seguità a prucessiò chì hà fattu u giru di u storicu quartieru di u mercà. San Ghjuvà purtatu da i cunfratelli di a cità, è alzatu ad’ogni spunta di mare per salutà l’Isula è a terra ferma di mare in là. Nuvità di a mudernità di sta tradizione, un focu d’artifiziu tiratu in serata da u molu ghjenuvese per ricurdacci i mille lumi di i fucarè spariti.

–

Petru Luigi Alessandri