U ROF (Rossini Opera festival) di Pesaro, in Italia, ghje ogn’annu una destinazione preziata da millaie di tifosi di Rossini. Si vene à Pesaro da tutte e parte di u mondu, da u Giappone à u Mediu Oriente, è di Corsica. Quì à l’arige di u mare Adriaticu ghje natu u 29 ferraghju di u 1792 Gioachino Rossini. E quì, dipoi u 1979 u ROF face rinasce ogn’estate a Musica di u più celebre di i pesaresi. Sè u ROF un’avìa esistitu, l’opera monumentale di Rossini ne era rimasta à u “Barbiere di Sivilla”, “A Cenerentola” “Guillaume Tell” o u “Stabat Mater”. Dipoi trentasette stagione Pesaro offre à u mondu di a lirica un Rossini risortu. Sottu a direzzione artistica di Alberto Zedda, U ROF mette à u so prugramma opere quasi smenticate o poche rappresentate di Rossini, ma dinò, bella sicura, capi lavori chi hanu alzatu à i pichji di a gloria musicale durente una parte maiò di u novecentu, quellu chi ghjera cunsideratu cume u più pariginu di i taliani. Rossini, si sà, deve à Parigi a più gran parte di u so successu immensu. Un successu chi un cessa quasi 150 anni dopu à so morte. E perciò che i francesi so assai affidati à u ROF. Parechji dinò sò i Corsi à francà u mare è traversà in largu a penisula da Livornu, per andà à sentesi un “pezzu” di Rossini in Pesaro. A stampa internaziunale copre u ROF, è quella isulana face regurlarmente i conti resi di e so serate : u mensile (oghje smaritu) “Corsica”, u settimanale “Le Journal de la Corse”, è a Radiu di Serviziu Publicu FranceBleu RFCM (di u gruppu Radio France) incù e so trasmissione “Mediterradio” “Kantara” è “Les fous d’Opera” induve ghje intervenutu, anni fà, in diretta, Alberto Zedda.
U Prugramma 2016 s’annunzia sottu à l’auspici i megliu. Inizierà l’8 d’agostu incù “La donna del Lago” sottu a direzzione di un’altru pesarese, giovanu ma digià capu d’orchestra di fama, Michele Mariotti. Hà direttu à Parigi à u mese di maghju à l’opera Bastille “A Traviata” di Verdi. Per sta prima, dui abituati di u ROF Juan Diego Florez è Michael Spyres duie voce di tenore di prima trinca. Seguirà u 9 “Il Turco in Italia” incù una distribuzione chi prumette. Si ritruverà quì dinò unepochi di ospiti cunnisciuti di u ROF, a bellissima voce di a suprana russa Olga Peretyatko chi ha avutu à u mese di maghju à Parigi à Bastille un successu maiò inde “Rigoletto”, u tenore americanu René Barbera è u baritonu sicilianu Nicola Alaimo chi ha fattu un trionfu annu à Pesaro inde “A Gazetta” un’opera di Rossini pocu ghjucata. A u pulpitu ci serà una donna : Speranza Scapucci italo-americana, giovane direttrice chi hà incantatu u teatru Regio di Torino à u mese di marzu scorzu inde una “Cenerentola”mudernisata da u regista Alessandro Talevi. Terza opera lirica u 10 agostu “Ciro In Babilonia”una ripresa di a pruduzzione di u 2012. Ma a distribuzione un serà a stessa. Sola Ewa Podles a grende contralto serà presente à fiancu à Antonino Siracusa tenore. Jader Bignamini cunducerà l’orchestra di u teatru cumunale di Bologna à u postu di l’americanu Will Crutchfield chi ghjera quì in 2012.
In più di se tre opere, fin’à u 20 agostu d’altri spettaculi so previsti. Cuncerti di bel canto, duetti amorosi, un’omaghju à Nourrit u grende tenore francese di u novecentu, creatore di i roli di Guillaume Tell e di u Comte Ory. E cume di solitu un mancherà “Il Viaggio à Reims”incù l’interpreti scelti da l’Academia Rossiniana.
A vitrina di stu ROF 2016 ùn pò che sedurre, per u restu anderemu à sente…
——
Articulu di Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.