Oramai dipoi u 23 marzu, di 7 ore à ott’ore e quartu ogni mattina u giurnale radiu di RCFM ghje televisatu nantu u canale di France3 corse Via Stella. Una decisione vulsuta da a tutela ministeriale chi vole fà cresce è trasmissione matinale d’infurmazione di a rete France3, iniziendu ùn partenariatu incù a rete France bleu chi ha in carga è radiu lucale di Radio France. Un canale radiofonicu di serviziu publicu assai dinamicu in mattina. Digià due radiu lucale avianu sceltu sta formula mista, quella di Tolosa e quella di Nizza. Ma sta formula ùn ghje più nova, postu che Radio France avia mischiatu à u livellu naziunale u so canale d’infurmazione cuntinuu France Info incù France Télévision. D’altre radiu private si so messe à sta moda, Radio Monte Carlo o RTL. Un fenomenu chi ha tendenza à stende si sapendu già che tutte è trasmissione di France Inter, a radiu naziunale di Radio France ponu esse viste nanta internet .E cusi che a voce radiu si muta in maghjina. Finitu u misteru vucale che a radiu ci uffrìa , di qualchi timbri vucali chi ci facianu sunnìa. Cume u libru a radiu ci permettìa di custruì u nostru ambiente. Quì ghjera quellu di l’acultatore, di facci dinò pittori di è nostre maghjine. U mudernisimu, a necessità, a storia chi va avanti, a voglia di fà nuvità à tutti patti….qualè chi sà è ragiò ? Ma è cose scambianu, per u nostru piacè o e nostre dilusione. E i media so quelli chi scambianu u più, e prestu.
A RCFM stu 23 marzu l’imbienza ghjera piutostu felice. U Direttore di Francebleu Jean Emmanuel Casalta, chi ghjera l’invitatu di a prima, specificava che sta nuvità ghje stata decisa à pro di i Corsi, Michela Castellani a capi redattrice di RCFM sperà, ella, che a radiu guadagnerà altri ascultatori. In quant’à squadra di sta matinale i giurnalisti Didier Arnoux , Elena Battini , l’animatrice Evelena Fontana e u realisatore Serge Jacobowsky avianu piutostu l’aria serena . E dimu la, l’esame ghje statu datu incù successu. Avà si aspetterà a reazzione di i Teleascultatori per sapè sè sta nuvità ha pigliatu fiatu o no.
—
Petru Luigi Alessandri.
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.