E manifestazione di u primu maghju ùn anu micca avutu u successu di quelle di annu. L’unita sindacale ùn ha resistitu à a scunfitta di a lotta contra a legge nant’à e ritirate. U guvernu ghjè passatu in forza negendu l’uppusizione di più di 90 % di i travagliatori è più di 70 % di i francesi. I curtei di prudesta di stu primu maghju 2024 eranu menu furniti.
In Bastia eranu un po più di 200 à sfilà trà u palazzu di ghjustizia è a prefettura, à a chjama di a CGT, di l’UNSA (sindicatu autonomu), FO è a FSU (educazione naziunale). U sindicatu rifurmistu CFDT avìa decisu di parte solu è sceltu u tema di l’Auropa. In quantu à u sindicatu naziunalistu STC avìa sceltu a cità di Corti per una cunferenza à l’Università à fine di festighjà i so 40 anni. Un solu partitu puliticu indè u curteu bastiacciu, u partitu cumunistu chi avìa lanciatu una chjama per un primu maghju di a Pace, di u Prugressu suciale è di a ghjustizia Suciale.
Ma st’annu indè e sfilate c’eranu dinò moti à favore di i palestinesi è prudeste contra l’assalti viulenti di l’armata d’Israele à Gaza, chi anu tombu, per ora, 15 000 zitelli è millaie di civili. “U massacru a Gaza deve cessà”, hà dettu a segretaria generale di a CGT, Sophie Binet.
Stu primu maghju 2024 cunnosce un ambiente suciale pisente è tesa incù e misure previste da u Guvernu di fronte à u deficit pubblicu chì spassa i 5 %. I primi à piscà so i disimpieggati incù una calada di e so allucazione è un ristrettu di u tempu d’indemnisazione. Misure severe indè a pulitica di a salute. Oramai si duverà pagà un’euro per scatula di medicamenti, unu per i servizi di l’infermieri, i massaghjatori, ecc… dui per una visita indè u medicu (ancu trè secondu i casi), quattru per un trasportu in’ imbulenza. Ma ci sarà una limita di 50 euri per annu. Stu sistema mette à cuntribuzione assai quelli chì sò in longa malatia. U Guvernu prevedde d’altre misure chi tucheranu altri capituli è chi un s’annunzianu à favore di i travagliatori cume quellu di e paghe. Si pò fà che l’uppusizione presentessi una muzione di censura per fa cade u Guvernu.
Un primu maghju à l’ambiente puliticu indecisu, i sundaggi un so tantu favurevuli à u partitu di u presidente Macron è danu un’avanzu impurtente à a strema dritta. A CGT annunzia una participazione di 200.000 manifestenti indè tutt’à Francia è 50 mila in Parigi. In Parigi induvè lu c’he statu unepochi d’inticci viulenti incù e forze di l’ordine.
Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.