I premii di u Libru Corsu 2017

Dipoi 33 anni a ghjurìa di u Premiu di u Libru Corsu (a più anziana di e ghjurìe di Corsica), face cunnosce in principiu d’estate e so scelte. Scelte fatte à a surgente di a pruduzzione literaria isulana chi offre ogn’annu una centinaia di opere, scritte in frencese e in corsu. St’annu contu tenutu di a qualità di i libri, u cuntrastu trà i 17 membri di a ghjurìa ghje statu riccu, un dibatitu in duie volte. C’hè statu una prima scelta di una quindecina di libri, poi una seconda per eleghje i laureati. Ghjè sottu à e fronde e a friscura di u venachese, in Santu Petru, che a ghjurìa s’hè adunita sottu à’ guida di à so presidente Jocelyne Casta. Una ghjurìa cumposta da scrittori, giurnalisti, prufessori, editori,librai e lettori. I Premii di u Libru Corsu si distacanu in tre capituli : Opere di scrittura Frencese,di scrittura Corsa e una categurìa Saggiu literariu.

U vincitore per a lingua frencese ghjè Jean François Roseau per u so rumanzu “La chute d’Icare” publicatu da l’edizione De Fallois. Un rumanzu chi conta a vita, l’avventura a legenda di Albertu Preziosi eroe di a seconda guerra mundiale. Hà fattu parte di à celebrissima squadra aerea “Normandie- Niemen” chi s’hè cuperta di gloria nanta u fronte di Russìa. Albertu Preziosi stu corsu, “omu acellu”smaritu indu u 1943 chi ghjera statu incù u so aviò accidentatu indè u desertu Libianu e chi s’era inamuratu di una berbera. Albertu Preziosi chi , sellu si nè crede a legenda, sarebbe u babbu di u culunellu Khadafi. “La chute d’Icare” hà digià ottenutu u premiu du u Rumanzu storicu di levallois-Perret cità vicinu à Pariggi. Ghje u secondu rumanzu di jean François Roseau.

Marceddu Jureczek hà pigliatu u premiu per a lingua corsa. “Chi ùn si fattu di guai” ghje u titulu di u so rumanzu publicatu da l’edizione Albiana. A storia di u rumanzu si passa in 1981 durente l’evenimentu tragicu di Bastelica Fesch in Aiacciu. Sta cronaca chi hà per logu l’hôtel Fesch induvè un cummandu di naziunalisti piglia in ostagiu tre omi, pressunti d’esse “Barbouzes” (omi di manu di i servizi secreti frencesi). Indè st’ambienza tesa nasce un persunnaggiu imaginariu chi difende di manera un pò esagerata una cultura corsa campagnola ch’ ùn ghje micca a soia. Un rumanzu chi piglia cume pretesa una cronaca per dipinghje un cuntestu più maio. . L’autore scrive in corsu di u Taravu, parlatu specificu di sta valle di corsica suttana.

In fine “Cuntrastu cù un mazzeru”di Ghjuvan Micheli Weber hà vintu indè a categuria Saggiu literariu. Ghje a prima volta che a ghjuria premia un’opera bislingua indè sta categuria. Un libru publicatu da l’edizione Colonna. L’autore face un’intervista di un “mazzeru”, persunnagiu stranu, maleficu per certi o un cunduttore di l’anime per d’altri. A questione chi si pone indè st’opera ghje quella di a situazione di u mondu veru…. di fronte à quellu stranu. Ghjuvan Micheli Weber ghje non solu scrivanu, ma cantà incù u gruppu “voce di a gravona”, ghjoca di viulinu e ghje dinò stitutore.

Ogn’annu a ghjurìa di u libru corsu sceglie un paese per a rimessa di i so premii. St’annu ghjè in Lozzi indè u Niolu che a ceremonia ghje prevista u 13 di agostu.

—

Articulu di Petru Luigi Alessandri