Mi ricordu di Pierrot quande lu ghjunghjìa à RCFM incù à so bicicletta ch’ellu pustava accantu à u studiu di regia, à u carrughju Favalelli. U so sguardu pienu di dulcezza è di malizia, à so frangia di capelli chì li battia u fronte. Calmu, è sempre prontu. Quante volte sim’andati à a festa di a scola induve li eranu i mio figlioli per sunurisà u spettaculu di i zitelli in fin d’annu sculare. E pò ci fù stà mattina piena di gioia. Hà francadu a porta di a radiu a bocca strapata da un surrisu splendidu. “Allora hè natu? Li chiestu”. “Ghjè una femina, si chjama Lauda”. Stu nome un l’avìa intesu dipoi almenu 40 anni è mi era tantu caru, ghjera quellu di una zìa chi avia persu i so dui figlioli è chì c’amava tantu in famiglia, stava in casa nostra. Ricordi oghje pieni di tristezza perchè in lu 1992, in stu 5 maghju, Pierrot ghjè statu arrubatu à u fior di l’età in Furiani.
Spezialistu prufeziunale di l’onde radiu è di u sonu, Pierrot sparghjìa un talentu di trinca per u disegnu. Era sempre incù à so penna è a so carta in manu. Ancu quande lu era in regìa à a realizazzione di una trasmissione radiu, Pierrot disegnava. Una passione tamanta. Tutt’e settimane indè u “Ribombu,” giurnale naziunalistu, abbuzava l’attualità in un disegnu forte, veru. In un trattu di penna nè dicìa quante un’articulu. Pierrot in fatti ghjera più giurnalistu che tecnicu è pò d’asse ch’ùn la sapìa? U so talentu spassava u settimanale naziunalistu, è i so disegni ghjeranu spessu publicati indè d’altri giurnali cume Kyrn o Paese. Pierrot manighjava indè à so arte un spiritu macagnosu in veru sgaiuffu di u carrughju di u mercà di Bastia. U so disegnu purtava non solu umurismu qualchi volta severu, ma dinò puesia. Ghjera un veru designatore di stampa.
Piu di 30 anni dopu à so sparizione una mostra ghjè stata urganizata (fin’à u 6 dicembre), à l’Arsenale, u lucale postu nant’à u baluardu di a citadella, è à RCFM vicinu. Più d’una centinaia di disegni chì contanu parechj’anni d’attualità di a Corsica di l’annate 80, ma dinò di mumenti persunnali chi soffianu una certa malincunìa. So statu stupitu di à quantità è a qualità di à so pruduzzione. Pierrot disegnava à l’inchjostru di Cina, ma u so ultimu l’ha fattu in culore turchinu, in omaggiu à u Sporting di Bastia, ghjè à fiancu à quellu di Petru Mari chì presenta una testa di microfonu. Una bell’ochjata à u nostru cunfratellu oghje smaritu.
Stu 5 maghju 1992 ghjeru à l’epuca capu redattore di RCFM, l’aghju vistu parte per u stadiu di Furiani induve lu duvìa assicurà a realizazzione di a trasmissione di a partita di ballò, allegru incù i so cumpagni di a radiu. “Aiò venni” m’ha lampatu da a finestra di a vittura, salutendumi di à so manu…
Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Ettore Timi 
Redazione