L’auguri di a Resistenza

In principiu d’annu ghjè l’epuca di l’auguri ma dinò l’occasione di fà qualchi bilanciu è di prumettesi un futuru più furnitu. E ghiè cusì che l’ANACR, l’associu di l’anziani è l’amichi di a resistenza, hà trincatu à un’annata di… resistenza. L’ANACR ghjè natu dopu a seconda guerra mundiale per ricurdà tutti quelli chi avianu pigliatu a macchja è chi so cascati per a liberazione di u paese, è perpetuà dinò incù i vivi u “soffiu” di a resistenza.

Oghje di l’anziani “clandestini” ùn ci nè più tanti è quelli chi fermanu anu passatu i 90 anni, ma a seguita ghje in fila di memoria. L’avvucatu Sestu Ugolini ghjè à u capu di l’associu in Corsica, è u so scopu principale, oltre e ceremonie di u ricordu, ghje d’andà ind’è scole per cuntà a storia di a resistenza è in particulare di a resistenza corsa chi hà permessu che l’isula sipia u primu territoriu frencese liberatu in ottobre di u 1943.

L’altru scopu di l’associu ghje di favurì un travagliu storicu nant’a resistenza. E cusi che ogn’annu un culloquiu adunice storici, studienti è testimoni di l’epuca. A publicazione di u settimu culloquiu ghje stata presentata à a ceremonia di l’augurri . “Storia è memoria di a resistenza” ghje u so titulu. U librettu, opera di a Stamperia Sammarcelli, cuncolta une pochi di testi . Quellu di S Ugolini nanta figure di a resistenza, cume quella di Paulu Bungelmi è Leo Micheli. Altra figura evucata da Dumenicu Maestratti quella di Carlu Bonafedi. U storicu Ubertu Lenzianu descrive un’esempiu di a Giuventu resistente in Niolu,in 1943 . Silvanu Gregori direttore di u museu di Bastia e storicu parla di a resistenza à u liceu di Bastia à a stessa epuca, è in fine u Prufessore emeritu di l’università di Marseglia , Jean-Marie Guillon, s’interessa à a giuventu resistente di a Provence è d’altrò.

Resistenza ! una parola sempre d’attualità ? Di sicuru risponde l’avvucatu Ugolini.” l’ANACR dà un sensu è una filusufìa à sta parola è nè sprime i valori “. Ma oghje contra cosa ci tocca à resiste ? “Sopra tuttu contra l’ideè rinascente, chi ci portanu versu un mondu che i resistenti anu luttatu per fà smarì 75 anni fà”.

Petru Luigi Alessandri