L’Alisgiani hà festighjatu a venuta di u Cardinale Bustillo à u Cunventu San Francescu

I ghjorni prima di l’ottu di settembre anu un profumu speziale in Alisgiani. Ancu s’è cambianu certe cose, ancu s’ellu ùn ci hè più u mondu di tandu, a festa di a Natività di a Vergine Maria hè sempre qualcosa di preziosu per l’Alisgianinchi. Quist’annu ancu di più.

Dumenica u 1° di settembre, per u terzu ghjornu di a nuvena, c’era pè stu Cunventu San Francescu d’Alisgiani un mondu scemu, cume un li si era più vistu da parechji anni (fora di l’ottu, bella sicuru). Alcuni eranu ghjunti assai in anticipu per esse sicuri di truvà un postu liberu ind’è a chjesgia, eppuru bella grande ma induve si aspettava ch’ella fussi piena, dighjà prima di l’iniziu di a messa chì avia da esse condotta da u vescuvu di a Corsica, u Cardinale Bustillo.

Benintesu, Monsignore Bustillo ùn hè micca u primu vescucu chì ghjunghe in Alisgiani in quelli ghjorni santi di i primi di settembre; mà per quantu ci ne ricordemu, pochi anu creatu una gioia cusì grande e sincera. U Cardinale hè ghjuntu accumpagnatu da u Padre Luc, u paroccu di e chjesgie di l’Alisgiani è di u Campoloro-Morianincu, u Padre Bertrand, u Padre Jean-Marie è u diacunu Franceschi: tutte ghjente di fede assai apprezzate in stu rughjone è chì anu datu ancora appena di bellezza a quell’incontru.

A messa hè durata un’ora ma l’emozione vissuta rimarrà per qualchi tempu ancora. Micca solu perchè l’incontru cù una persona di tale impurtanza hè di fattu un mumentu spezialu; mà sopratuttu perchè Monsignore Bustillo hà dimustratu di esse l’omu chì tutti anu imaghjinatu: una persona amabile, verramente cuntenta di esse qui in Alisgiani, è forte di una pazienza infinita. Hà salutatu à tutti, hà pigliatu u tempu di ringrazià ciascunu. Capiscu, sè vò truvete una certa ingenuità in queste parole. Mà ci vole à pensà chì, in questi rughjoni muntagnoli spopulati, a volte dimenticati, a ghjente hà bisognu di vede chì qualcunu li dà u rispettu ch’ella merita. Quellu rispettu, u Cardinale Bustillo l’hà dimustratu senza calfa.

Dopu à a messa, tutti si sò radunati ind’è u chjostru per sparte un vichjeru di l’amicizia, organizzatu da a merria di i Piazzali è a Cumunità di e Cumune di a Costa Verde, è priparatu dall’altru latu di l’Alisgiani da Christine Bereni. Un mumentu di festa, d’amicizia, perfettu per esse in ottima condizione per l’ottu di settembre è a tradiziunale celebrazione di a Natività di a Vergine Maria cume sempre quì, per ‘ssu maginificu Cunventu San Francescu d’Alisgiani.

–

Immagine di Sophie Bereni per Corsica Oggi