Sta fine di settimana omu s’hè spicciatu per l’auguri, prima che ghjennaghju ùn si n’andessi. Auguri di associi o stabilimenti publichi . Occasione di « Pace E Salute » à vuluntà, e di « tirà i rè » pè ripiglià a spressione frencese : « tirer les rois ». Vale à dì, festighjà a Pasqua Pifanìa incù a tradiziunale torta farsita di crema d’amandulè, o d’un’altra à pasta reale, è induvè lu si trova un sugettu chi vi face rè di un’istante. U tempu d’ incarfà una curonna di carta per quellu o quella chi u trova. Un si face auguri senza què ! e d’altri dulciumi o roba salita. In fatti un rinfrescu bellu piacevule.
Ma l’auguri so dinò l’occasione di fà bilanci di l’annata scorsa e prugetti per quell’à venne. A l’ospitale di Bastia u direttore, Pasquale Forcioli, ha qualificatu l’annata 2018 di « difficile ». Difficultà finanzere incù ùn deficit di 15 miglioni per annu, difficultà di truvà medichi, difficultà indè u serviziu d’emergenza. Ma ci sò ancu ,aspetti pusitivi. L’ospitale ha datu 90 mila cunsultazione, ha ricevutu 37 mila personne in emergenza e listessa ciffra in ospitalisazione. In 2019 ci sera un bloccu operatoriu novu e mudernu . « U più sicuru di corsica » ha specificatu u direttore.
A resistenza sempre…
L’auguri di l’anziani di a resistenza hè sempre un’occasione di raminta a storia. U presidente di l’associu l’avvucatu Sistu Ugolini vole tenne a fiamma alta di u ricordu ma dinò mettesi à l’ora oghjinca. Un scurdassi di quelli chi anu resistitu in arme contra u fascismu e anu liberatu a corsica in 1943, e poi resiste oghje contra quelli chi favuriscenu è teorie di l’esclusione, chi laudanu u naziunalismu egoistu e chi si servenu di a verità per mentire sbagliendu cusi u populu. L’associu di a resistenza ha dinò presentatu l’atti di u so cullochiu di maghju 2018 nanta u tema : « sperenze e realità di a liberazione di a corsica ».
L’indicapati mubilizati per u so megliu
A l’associu di i Paralisati di Francia l’imbienza ghjera festiva ma u penseru c’era dinò. Si hè, bella sicura trincatu à l’annu novu fendu u custattu che u 2018 ghje statu per l’associu di Corsica piutostu pusitivu incù in particulare a messa in opera di permanenze suciale indè l’internu di l’isula per aiutà i disabili o d’altre personne cume l’anziani chi ùn si ponu spiazzà, à pudè riceve infurmazione nant’à i so dritti o custitui cartulari aministrativi. I disabili portanu penseru per un 2019, perche une poche di misure previste da u guvernu ùn favuriscenu tantu a so cundizione.
In cunclusione : per avè, o piutostu fassi un’annu novu migliore, ci tocc’à resiste e cumbatte per ottene una pace suciale durevule à fine di preservà o acquistà una salute indispensevule.
—
Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.