[In corsu] Sta dumenica c’è u “Derby della Madonnina” è si cerca sempre un emittente per a Serie A in Francia

Sò sempre numerosi quelli chì in Corsica sentenu un certu attaccamentu versu una squadra di a Serie A. Micca tantu trà i ghjovani chì oghje preferiscenu quell’inglese o spagnole, ma ùn pensu micca sbaglià quandu dicu chì a tutti quelli appassiunati di ballò di più di 40 anni piace assai seguità una partita di u Milan, di a Juve o di l’Inter.

Eppò sta dumenica si ghjocherà a Milano una di e più belle partite di l’annu. A sfida trà e duie squadre di a cità, u “derby della Madonnina”. Bah, dicu “bella partita” ma ghjè vera chì ùn si sà micca s’ella hà da esse cusì bella nant’à u terrenu. Ma almenu simu sempre sicuri chì u pubblicu di San Siro ci rigalerà una festa tremenda. Una dumenica sera cù una partita Inter-Milan a vulemu cusì, cume lu si sentia in un certu filmu talianu: “poltrona, tavolinetto apparecchiato davanti al televisore, vestaglione di flanella, spaghetti in cottura, birrone gelato, rutto libero!” *

Sfurtunamente, sembra chì noi corsi sta partita ùn la fighjeremu micca! O allora impiegendu mezzi pocu legali, ma quessa riguarda quellu chì vole. Quattru ghjurnate di campiunatu di Seria A sò passate, c’è ancu statu una settimana dedicata a e squadre naziunale è nonostante tuttu ‘ssu tempu per discutà, nisunu emittente in Francia hè statu trovu per trasmette a Serie A. Benintesu e cose valenu ancu pè a Corsica. Si pò paghà un prezzu scemu per una Ligue 1 ch’ùn vale mancu un chjodu; si pò fighjà una partita di livellu dilettantu di u campiunatu Saudi, ma sta dumenica ùn si puderà micca seguità Inter-Milan AC.

Secondu u ghjurnale francese «L’Equipe», a Lega Calcio sarebbe sempre in negoziazione cù duie emittenti, DAZN è Bein Sports. “E cose anu avanzatu appena ind’è l’ultime settimane […], a Lega rimane cunfidenta” hà scrittu u ghjurnale. Speremu ch’elli ci ghjunghjessinu, prima chì no ci perdimu tutte e più belle partite d’andata. Eppò, immaginate voi se l’Udinese ci và finu à a fine è chì noi poveracci ùn lu pudemu micca vede… Ridateci a Serie A!

–

Guillaume Bereni

*Se ùn avete mai vistu u filmu da induve esce s’infrasata magnifica, u vi cunsigliu assai. Si chjama “Fantozzi contro tutti”, ghjè unu di i numerosi filmi di u grande attore comicu ghjenuvese, Paolo Villaggio. Apprufitate puru di a vostra capisciatura di u corsu per pruvà qualcosa di novu cù stu filmu talianu!