U giru d’estate di u Gruppu di cant’autori i Muvrini s’hè compiù luni 20 agostu in Bastia. A piazza Vincetti era colma di ghjente venuti àd’asculta u gruppu miticu di a canzona Corsa. Una cunclusione chi s’hè fatta inn’ù cuntestu particulare, postu che qualchi ghjorni fà in Cargese l’affissu di u cuncertu, previstu indè a cità greca, ghjera stata imbrutada dà une pochi di scritti pocu simpatichi cume : « Muvrini Fora ». Scritti cundannati dà eletti è parechji associi. À u cuncertu di Bastia a risposta si lighjìa nanta i moti sposti in giru à u palcuscenicu : « Fora ùn l’hà so dì », « simu ciò che no femu » o « un palmu di nettu ». Da più di 30 anni i Muvrini cantanu a corsica, ma cantanu dinò u Mondu. Cantanu l’amicizia, a sulidarietà, l’accuglienza a No viulenza. A so fundazione, UMANI, ghje una surghjente d’aiuti per opere suciali, culturale, à prò dinò di quelli chi si la stentanu incù fatiga in Corsica è altro, per a rinascita di u sapè fà tradiziunale. I Muvrini ùn sò solu un gruppu cantarinu, sò un’associu d’artisti chi porta un messaghju di liberazione di i cunservatisimi, di è tirannìe, di i naziunalismi chi striticenu i populi è e mente. Un messaghju contra i razzismi o l’esclusione… Fora ùn l’hà sanu dì…
U cuncertu di chjusura estiva in Bastia, purtendu canzone anziane è nove, hà cantatu sti temi. U passu di scena ghje prufeziunale, u gestu generosu, a parola affetuosa. E voce so calle, piene , tondule, ùn so cuntrafatte, so spudiche. Ghje un veru piacè di sente i Muvrini. Un spettaculu di musica, di lumi è di maghjine chi mostranu à Corsica è altrò… . Un gruppu pluriculturale chi sona à tempi nustrali è strangeri, pruvendu che a musica u cantu trapassanu i cunfini. Tubu scuzzese o tamburu africanu tuttu ghje unu in musica è i Muvrini l’offrenu à u publicu. Omaggiu à Aretha Franklin scumparsa ghjorni fà, chi hà cantatu a liberazione di u populu Negru.
I Muvrini offrenu dinò u so palcuscenicu à artisti nascenti. À Bastia a guitarista classica Sabrina Luigi ghje stata un veru incantu. Pezzi di Albeniz, Tarrega, Atahualpa Yupanqui, musica pupulare corsa sotta diti di fata, una tecnica è un talentu tamantu. Sabrina Luigi ghje prufessore di guitara à a scola naziunale di Musica. Hà sublimatu u publicu bastiacciu. Un publicu dopu tre ore di spettaculu chi hà fattu un veru trionfu à i Muvrini chi anu chjosu u cuncertu incù « bella ciao » invitentu cusi à ghjente à esse partigiani di a libertà. « Vultemu o micca ?» u motu ghjera prughjetatu nanta un schermu.
Vultate è prestu dicianu l’applausi…..
—
Petruluigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.