I calori venuti, a Corsica si mette in festa. Da Bastia à Aiacciu, da Capi Corsu à Bonifaziu è di e Marine à e Muntagne, a Corsica canta, sona è balla.So fiere, festivali di musica, o feste patrunale di i paesi chi sveglianu u tempu di l’estate un internu adurmintatu.
Unu di i scontri i più preziati, cunnisciutu à u livellu internaziunale ghje di sicuru “E notte di a Ghitara” di Patrimoniu (17-24 Lugliu). Natu 27 anni fà grazia à a vuluntà di Ghjan Bernardu Gilormini stu festivale ha vistu sfilà nant’u so palcuscenicu sott’à e stelle, e più grande pianete di a ghitara.
St’annu accuglierà Yamandu Costa u più famosu ghitaristu bresilianu attuale è una quindecina d’altri artisti di fama cume Francis Cabrel, Thomas Dutronc o u Corsican Trio.
A Fiera di U Vinu di Luri in Capi Corsu (9-10 lugliu). Quì ghje un scontru incù a verità vinicula di l’isula. Ma u vinu ùn si tasta solu, si vive, è parechje altre attività so previste, balli, teatru, cunferenze incu Lea Siffredi, è musica.
In fine e duie cità maio di Corsica, Aiacciu è Bastia offrenu à e so ghjente ma dino à i furesteri unepochi di scontri festivi musicali è cummerciali incù ogni venneri l’animazione di notte induve tutte e butteghe seranu aperte. E in Bastia di u 24 à u 28 d’agostu A Bucciata Bastiaccia 2016 per tutti l’amatori di ghjocu à Bocce.
—–
Articulu di: Petru luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione 
Guillaume Bereni