Elezzione Territuriale : Simeoni Rè di Corsica

Ghjè statu un trionfu ! I naziunalisti uniti (autunumisti è independentisti) hanu vintu l’elezzione territuriale chì purterà à ghjennaghju prossimu una sola Culletività per a Corsica. 67.155 voce e 56,40 % ghjè u resultatu per Simeoni, chì guadagna più di 13.000 voce da rapportu à l’elezzione di 2015. L’altri candidati vennenu luntanu daretu. Ghjan Martinu Mondoloni per a dritta regiunalista conta 21.755 voce è 18,29 %, poi Ghjuvan carlu Orsucci u partitu di u presidente di a Republica 15.074 voce e 12,67 % in fine l’ultima ghje Valeria Bozzi dritta republicana 14.950 voce è 12,57%.

Indè a prossima Assemblea u partitu di Simeoni cunterà 41 cunsiglieri, Mondoloni 10 e 6 ognunu per Orsucci e Bozzi. Ma stu scrutinu ùn ghjè statu una prova di demucrazìa. Guasi 50% di i corsi ùn so micca andati à vutà e l’astenzione ghjè ancu più forte indè e cità di Bastia e d’Aiacciu in particulare indè i carrughji pupulari. Valè à dì che un corsu nant’à dui ùn s’hè sentitu cuncernatu da st’elezzione, un corsu nant’à dui un’accunsente à a culletività unica, è un corsu nant’à dui ùn trova indè l’offerte pulitche e suluzione à i so prublemi oghjinchi. Stu ricusu di a pulitica e di i pulitichi merita riflessione per l’andadura di a démucrazìa. U mondu puliticu ùn pò lascia sta chjama senza risposta. A Corsica ghjè a regione di Francia a più povera, e induve lu c’hè u numeru di poveri u più maiò da rapportu à a pupulazione (più di 60.000 nanta 320.000 abitenti) e ùn disinpieghu al dilà di i 22 %. A situazione di i trasporti ùn ghjè suddifascente à l’internu cume per u fora, quella di a pulitica di a salute ùn ghje megliu, e l’agricultura cunnosce difficultà à sbuccà mercati altrò. In quant’à u turismu ,l’attività economica principale, ùn prufitt’à tutti. Eccu u cartulare per l’eletti novi. Ma di què indè a campagna eletturale sin’hè parlatu pocu, messu à parte i cummunisti e u rinnovu l’altru currente independentistu, ma tutt’è dui ùn sò stati qualificati. I dibatti anu purtatu nant’à l’autunumia o l’indipendenza à long’andà. Ghjuvan Guidu Talamoni l’hà detta dopu a vittoria dumenica sera à a Radiu di Serviziu Publicu RCFM :” Di fronte a u resultatu di i naziunalisti u Guvernu deve oramai ascultacci. Sellu stà mutu ci sarà una mossa pupulare”. E Frencescu Orlandi elettu di a lista Orsucci e presidente di u cunsigliu dipartimentale di u Cismonte chi spariscerà frà tre settimane, li hà rispostu :” l’urgenza oghje ùn ghje l’autunumia, sò i prublemi suciali”.

Ma dumenica sera per i naziunalisti ghjera festa. Anu circulatu indè paesi e cità in trumbendu, cantendu e facendu l’evvive à fucilate . Gigliu Simeoni ghje dunque u rè di corsica cumè l’ha detta Dumenicu Bucchini anzianu presidente cummunistu di l’Assemblea di Corsica per qualificà quellu chi sarà à u capu di u Cunsigliu Esecutivu .

—
Petru Luigi Alessandri