Castellare di Casinca : « Leteratura à a funtana », autori in cunfrontu

Oramai Castellare di casinca ogn’estate ghje diventatu u locu leterariu induvè ci tocca à esse. « leteratura à a Funtana » ghje non solu un’iniziativa originale di l’associu « Castell’art », ma un cuncettu chi adobra una spezia di demucrazia di a parolla. À Funtana di a piazza San Bastianu ghje u simbulu di l’adunita. L’acqua corre, cume i discorsi, ma appaghja a sede di dibatittu, di cuntrasti, tra scrivani è publicu. Dipoi tre anni u scontru di u Castellà face corre i spiriti leterarii. Quelli nustrali è quelli d’altrò.

A l’apertura c’era statu Delphine de Vigan una di è scrivane frencese è più in vista oghje. Per l’edizione 2018 so stati quatru à pusassi in giru à a funtana. Ghjuvan Guidu Talamoni u presidente di l’Assemblea di Corsica incù Marie Ferranti scrivana corsa di famma, premiata da l’Academia Frencese. Ghjeranu quì per u so libru cummunu di currispundenza, Jean-noël Pancrazi chi un conta più i so premii, cumme u «  Medecis », è chi face parte di i 10 primi scrivani frencesi, è in fine Leila Slimani premiu Goncourt 2016 per u so libru « chanson douce », scrivana franco-maruchina chi hà pruvucatu une pochi di pulemiche è cuntrasti in 2017 incù a publicazione di un libru nant’a sessualità à u Maroccu (sexe et mensonges). Leila Slimani militente di a libertà di è donne è di a libertà sessuale, ghje stata numinata da Emmanuel Macron per esse à so ripresentente à u Cunsigliu di a Francofunia.

C’era dunque assai ghjente à a calata di u sole piazza San Bastianu in stu mese d’agostu. A l’umbria, indè u treghjime di u spuntà di a notte è lingue si so scolte. Cunfronti tra autori è publicu. Pancrazi hà parlatu di u so libru « je voulais leur dire mon amour » un’opera piena di malincunìa, Talamoni è Ferranti anu spiegatu cume era nata sta relazione epistulare cuncolta indè un libru « Un peu de temps à l’état pur » chi mette in lume i legami trà leteratura è pulitica. Si aspetava leila Slimani chi ghje in qualchi modu a « Coqueluche » di i media incù u so discorsu nanta a sessualità liberata. Indè « Sexe et Mensonges » l’autore hà riguaratu une poche di testimunganze di donne marucchine nant’à realità di u sessu à u Maroccu. Una sessualità piatatta, incapucciata da a religione, induvè a donna ùn si po move è sprimesi che spusata. Ghje a pusizione murale chellu s’acetta in lume. « Si face tuttu à u Maroccu ma ùn si deve sapè nunda »….Eccu u trattu di u libru. Leila Slimani si face avvucata di fronte à qualsiasi publicu, chellu fussi quellu di una piazza di paese o quellu di   loghi  « branchés » di Pariggi o d’altrò. « Leteratura à a Funtana » schiarisce è mente. Dopu u piace di u spiritu quellu di à bocca. A piazza si muta in spaziu di pranzu sottu à è stelle, per lascia andà è parolle in cunvivenza.
A quale accuglierà a Funtana di San Bastianu di u Castellà u prossimu estate ?……simu golosi di sapè…

—
Petru luigi Alessandri