In stu settembre un c’hè micca che e scole chì facenu à so rientrata. C’hè un’imbienza di scumbugliu, d’agitazione, di sussuru, un focu in qualchi motu, chì piglia in ogni parte. Si corre in quà è in là per scrivesi à a ginnastica, à un club di scopa, à un altru di cucina, à una maestrìa di cantu… o ancu à un’associu di carità. In fine à unepoche d’attività chì ci facenu scurdà di a vecchjaia o trasaltà a giuventù. Ghjè l’ora di prugrammà un’annata per grande e chjughi fora di u murtulime di l’abitutine. E un mancanu l’offerte.
Ma c’hè un’associu chi ùn s’assumiglia à nisùn’altru. Per entracci, bisogn ‘à sparte una passione, à cultivà un piacè, à sentesi in cummunione culturale, linguistica, gastronomica, geografica. In corte parolle, amà l’Italia ! E sè vo riunite ste qualità, “A Dante Alighieri” vi apre e so porte.
Quì per tuttu l’annu camperete in modu penisulanu. Amparerete a lingua sè la hè pocu precisa per voi, senterete cunferenze diverse prununziate da sapientoni cume quella prevista à nuvembre incù quatru circatori genuesi è ferraresi, farette viaghji in Tuscana o indè d’altre cuntrade, averete u privilegiu di visità mostre soli soli, cume prestu, in Bastia per “Corsica genuese”, o in ottobre à u museu Fesch in Aiacciu. “A Dante Alighieri” ghjè l’Italia in casa vostra. E in Bastia campa dipoi più d’un seculu. A vicinanza di a terra ferma taliana ha sempre favuritu e relazione trà a cità è in particulare a Tuscana, e in seguitu l’insemme di a penisula. Si usava u talianu in Corsica fin’à quasi u 1914 allora che a corsica ghjera Frencese dipoi u 1769. E cume lu dice incù verità u pruverbiu “Da capi corsu à Bonifaziu aria di Roma è mare di laziu”.
A Dante Alighieri di Bastìa adunisce più di 200 soci e urganiseghja decine di manifestazione culturale ogn’annu. Prumove a lingua taliana incù i so corsi à i maio ma dinò inde e scole primarie. Nicole Matelli-Filippi, a Vice-presidente, ghjè incaricata di sta prumuzione.
A Dante ha fattu à so rientrata accuglientu anziani e nuvelli “tifosi” di l’Italia u 12 settembre inde i so lucali di u vecchju cunventu sant’Anghjulu di Bastìa . A prima à stende e bracce à l’arriventi ghjera Maria Teresa Raffalli, a Presidente. Dunque : Avanti a Dante !
—–
Articulu è fotò di: Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.
Redazione