Arte Mare : Una cunclusione in apoteosi à Bastia, è un omaggiu à Petru Mari

Un c’era più un postu di liberu à u teatru di Bastia per a serata di Premii Arte Mare. Tuttu u Bastia culturale è al dilà, ghjera quì per assiste à u spettaculu dopu una settimana di scontri, di scuperte di filmi di tuttu u mediterraniu. Arte Mare ghje u più anzianu festivale di cinema di Corsica, nè hè à’ so 36esima edizione. Una manifestazione chi face corre millaie di spettatori. Un successu in somma !

St’annu u tema di u festivale ghjera a musica di filmi è parechje persunnalità di st’arte ghjeranu presente, cume Bruno Coulais. Thierry De peretti regista corsu realisatore di u filmu « Une vie Violente » presentatu à u festivale di Cannes presidava a ghjuria. À u tutale una sessantina di filmi à u prugramma incù una bella furnitura di opere corse. Un cinema chi cummencia à piglia fiadu è chi porta qualchi autori di talentu cume Lisandru Oppecini vincitore di u premiu indè sta categuria. Ghje u Filmu tunisinu « Mon cher enfant » di Mohamed Ben Attia chi ha guadantu au Gran Premiu Arte Mare. Storia di una famiglia incù a prublematica di a partenza di un figliolu in Siria……Un ritrattu di u mondu musulmanu di u 2018 catturatu dà u regista. Un festivale chi franca i muri , ancu quelli di e prigiò. 8 prigiuneri di a prigiò di Borgu chi frequentanu l’atellu audiuvisiu anu custituitu una ghjuria per dà u premiu « al dilà di i muri » . E ghje u filmu di Isabella d’Olce « Au commencement » chi l’ha ricevutu. Iniziativa interessente di Arte mare è di u Centru penitenziariu chi permette cusi à quelli chi so privi di libertà di pudè participà à una manifestazione culturale in essendu attori. E pruvà in qualchi modu che u fora un ghje strangeru à a clusura. E che e finestre ponu apresi di parechje manere.

A radiu di Serviziu Publicu Francebleu RCFM hà rimessu u premiu chjamatu oramai Petru Mari . Premiu per a miglior musica di filmu. « Yomeddine » di l’egizzianu Abu Bakhr Shamky hà vintu stu primu premiu Petru Mari. Un’opera chi ha dino ricevutu u premiu « voyage Air France », è quellu MGEN di u Publicu. «  Yomeddine » conta a storia di un malatu guaritu di a lebbra, ma chi nè porta sempre e ferrite. A st’occasione u festivale ha resu omaggiu à Petru Mari giurnalistu di RCFM chi hà creatu e trasmissione mediterranée, Kantara è Mediterradio. Dipoi 20 anni incù ste trasmissione RCFM porta a voce di u mediterraniu nanta l’onde in partenariatu incù a RAI Sardegna è Sicilia per Mediterradio o incù e radiu Publiche di l ‘Algeria a Tunisia, u Maroccu , L’Egittu, a Spagna, u Libanu per « Kantara ». RCFM chi grazia à l’iniziativa di Petru Mari ghje diventata a pulena di Radio France indè u mediterraniu.

Petru Luigi Alessandri

 

I premiati Arte mare 2018

Premiu di e scole di cinema

« The Last harvest » di Maayan Blech, Israele-Italia

« Solte » di Jean Costa, Francia Brasile

Premiu di u filmu corsu

Documentariu « On m’a donné la terre » Francescu Artilly

Fizzione :  »Sur les traces » Lisandru Oppecini

Premier al dilà di i muri

« Au commencement » Isabelle d’Olce Francia

Premiu Ulysse

Prima opera Lise marzouk per « Si »

Per l’inseme di à so opera Marie Ndiaye

Cumpetizione di u filmu mediterraneu

Pass Cultura : « Euforia » di Valeria Golino, Italia

Premiu voyage Air France : « Yomeddine » Abu Bakhr Shawky,

Egittu

Premiu RCFM Petru Mari « Yomeddine »

Premiu MGEN di u Publicu : Yomeddine

GRan Premiu Arte Mare Negroni Voyage : « Mon cher Enfant » Mohamed Ben Attia Tunisia