A fiamma Olimpica hà infiaratu a Corsica

A settimana scorsa, a Corsica s’hè infiarata per a venuta di a fiamma Olimpica. Da punente à levante, da cismonte à pumonte, i paesi, e cità, e strade, e vie, i carrughji sì sò empiuti di ghjente allegre per salutà una fiaccula, una spezia di cirone opera in aciaru di u designer francese Mathieu Lehanneur è fabricata da ArcelorMital. Si n’hè pruduttu 2000. Un ci tuccava micca à risparmià perchè quandu la sarà ghjunta in Pariggi a fiamma averà percorsu 12000 chilometri è i purtatori averanu compiu a ciffra di 10000. Stu cirone ùn ghjè micca statu accesu per un Santu, ma per una santificazione, quella di i ghjochi olimpinchi di Pariggi previsti à d’agostu prossimu.

Una tradizione millenaria nata in Grezia antica, ma chì avìa tandu un significatu religiosu. U focu, segnu di purezza ghjera accesu in ogni tempiu, è a fiaccula d’Olimpìa, induve si passavanu i ghjochi, brusgiava ind’è u tempiu di a Dea Hera. Ghjeranu e donne chì accendianu a fiamma è chì a tenianu d’accontu. U focu nascìa da i raggi di u sole per mezu di un specchju parabolicu. Sta fiamma sulare purtava cusì una purezza nativa, genetica. Oghje si face sempre di a stessa manera, perpetuendu un custume antichissimu.

In 1936 una fiamma fascista

Ma u percorsu di a fiamma olimpica hè più recente, è appartenne à una storia tantu onorevule. U giru di a fiamma ghjè statu inventatu da un certu Carl Diem, un tedescu, è appruvatu da Hitler per i ghjochi olimpichi di u 1936 in Berlinu. Avia cume significatu, tandu, a glurificazione di u Reich Hitlerianu. Omu s’hè scurdatu di stu fattu chi ùn dava tantu gloria à e facende spurtive. I nazisti cancellavanu e virtù vulsute da u Barone frencese Pierre de Coubertin, chì hà fattu rinasce i ghjochi olimpichi. Oghje e cose, per furtuna, sò altre.  L’urganizatori di i ghjochi anu ripigliatu i moti di De Coubertin per dà à u percorsu di a fiamma olimpica un significatu di pace è d’unità. È e ghjente corenu, battenu e mane, si rallegranu à u passagiu di stu simbulu lucente.

In Bastia ùn s’era mai vistu tant’à ghjente impie a piazza Santu Niculà dipoi, po d’asse, l’incurunamentu di a Madona di Lavasina da u cardinale Roncalli in 1952

Ma quantunque un sipiimu micca ingenui. U percorsu di a fiamma hè sempre, oghje, un’operazione pùlitica è cummerciale. Un ci tocca micca à cunfonde, cume si dice in Bastia. In ogni manifestazione publica ùn c’hè nunda di schiettu. Un c’era che da vede a caravana chi precedìa a fiamma, è chi spunìa publicità per unepochi di prudutti cummerciali, o chi vantava certi stabilimenti. Hè cusì! A caravana di u giru di Francia ciclistu, d’altronde, uù n’hè finìa più, l’avemu vista in lu 2013. 180 000 euri, eccu u prezzu che lu c’hè vulsutu à dà per avè a fiamma. Un prezzu caru è parechje municipalità ci anu rinunciatu. A fiacula ùn ghjè micca per tutt’e stacche.

Ma rivenimu à u percorsu di a fiamma in Corsica. Eranu centianie à u so passagiu, è d’ùn colpu i paesi si sò pupulati, anu rivinvitu u tempu di una sfugita. Piedicroce in Orezza hè passatu di 80 abitenti à quasi 450, è Campana di 25 à più di 250. Miraculu di stu focu sacru. In Bastia ùn s’era mai vistu tant’à ghjente impie a piazza Santu Niculà dipoi, po d’asse, l’incurunamentu di a Madona di Lavasina da u cardinale Roncalli in 1952. Hè quì nant’a più bella terrazza di u mediterraniu di fronte à u mare tirrenu, sottu à u sgardu di l’isule Tuscane è à l’ombre luntane di e muntagne taliane è di u Pignu vicinu, chellu s’hè compiù u giru corsu di a fiamma olimpica, lampendu in stu locu un messagiu d’universalità.

Petru luigi Alessandri